նախընտրելի դարձնելԲյուրեղավանի գիշերօթիկ հաստատության նախկին տնօրեն, յուրացման մեջ մեղադրվող Գայանե Մարգարյանի խափանման միջոցը կալանավորում ընտրելու՝ առաջին ատյանի կայացրած որոշումը փաստաբան Ռուբեն Բաբայանը բողոքարկել է ՀՀ վերաքննիչ քրեական դատարան:
NEWS.am-ի թղթակցի հետ զրույցում փաստաբանն ասաց, որ այս պահի դրությամբ շուտափույթ է նրան կալանքի տակ վերցնելը:
«Ֆինանսա-տնտեսական գործունեության վերաբերյալ ստուգումը նշանակվել է դեկտեմբերի 1-ին, պատասխանը կլինի 2-3 ամսից: Սա նշանակում է, որ չկա փաստ առաջադրված մեղադրանքի վերաբերյալ: Հետեւաբար, կալանքի տակ պահելու հիմքեր էլ չկան, մինչդեռ նախաքննական մարմինը խափանման միջոցը ընտրելիս պնդեց, որ Գայանե Մարգարյանը կարող է փախուստի դիմել, խոչընդոտել նախաքննությանը, բայց նա վաղուց աշխատանքից ազատված է եւ լծակներ չունի, որ ազդի մարդկանց վրա»,- նշեց Ռուբեն Բաբայանը:
Նրա խոսքով՝ իրենք առաջարկում են գրավի դիմաց ազատ արձակել գիշերօթիկ դպրոցի նախկին տնօրենին. «Պատրաստ ենք վճարել ցանկացած չափի գումար, ինչքան որ դատարանը սահմանի»:
Դատական նիստի օրը դեռ հայտնի չէ:
Նշենք, որ ըստ Քննչական կոմիտեի՝ Գայանե Մարգարյանը 2007-2014 թվականների ընթացքում, կազմակերպության կադրերի գծով տեսուչ Ա.Հովսեփյանի օժանդակությամբ հրամանագրել է ՊՈԱԿ-ում փաստացի աշխատանքներ չկատարող 28 աշխատակիցների: Արդյունքում` պետական բյուջեից ՊՈԱԿ-ին փոխանցված գումարներից վերոհիշյալ անձանց անուններով ելքագրել ու յուրացրել է իրեն վստահված առանձնապես խոշոր չափերով` 46.535.970 ՀՀ դրամ գումար՝ ներառյալ ամենամյա եւ ֆիզիոլոգիական արձակուրդայինների համար տրվող գումարները: Բացի այդ, 2004-2014 թվականների ընթացքում Գ.Մարգարյանը, պաշտոնեական դիրքն օգտագործելով, ՊՈԱԿ-ի գլխավոր հաշվապահ Փ.Մարտիրոսյանի եւ կադրերի գծով տեսուչ Ա.Հովսեփյանի օժանդակությամբ, հաշվարկել է ՊՈԱԿ-ում փաստացի չաշխատող 4 աշխատակցի, սակայն նրանց անվամբ ելքագրված գումարները տվել է ՊՈԱԿ-ում աշխատող նրանց հարազատներին եւ ՊՈԱԿ-ի այլ աշխատակիցներին՝ որպես լրավճար` այդկերպ ՊՈԱԿ-ի միջոցներից վատնելով իրեն վստահված առանձնապես խոշոր չափերի՝ ընդհանուր 7.747.358 ՀՀ դրամ գումար:
Ավելի վաղ NEWS.am-ը հայտնել էր, որ Բյուրեղավանի գիշերօթիկ դպրոցի մի խումբ աշխատակիցներ ապրիլի 4-ին բաց նամակ էին տարածել հաստատությունում տիրող անառողջ բարոյահոգեբանական մթնոլորտի, երեխաների հանդեպ բռնություն գործադրելու, ֆինանսական ապօրինությունների, ՊՈԱԿ-ի տնօրեն Գայանե Մարգարյանի՝ պաշտոնեական դիրքը չարաշահելու ու հովանավորչությունից օգտվելու վերաբերյալ: Լրատվամիջոցները եւ սոցիալական կայքերը արագ արձագանքել են դրան, այցեր կատարել հաստատություն ու հարցազրույցներ վերցրել աշխատակիցներից ու երեխաներից:
