նախընտրելի դարձնելCreditCards.com վերլուծական կայքի մասնագետները Ամերիկայի 1000-ից ավելի բնակիչների շրջանում հարցում են անցկացրել եւ եզրակացրել, որ ամերիկացիների ավելի քան 10%-ը կարծում է, որ կմեռնի նախքան վարկերը մարելը:
Այսպես, բնակիչների ընդհանուր թվի 13%-ը եւ վարկային պարտավորություններ ունեցողների 18%-ը կարծում է, որ կմեռնի նախքան պարտքերի մարումը:
Հարկ է նշել, որ մինչեւ 30 տարեկանների խմբի ներկայացուցիչներն առավել վստահ են իրենց ուժերի վրա եւ միայն նրանց 6%-ն է կարծում, որ չի կարողանա մարել վարկերը: Իսկ ահա ավագ տարիքային խմբի ներկայացուցիչները՝ 65 եւ ավելի տարեկան, այնքան էլ լավատես չեն այս հարցում: Այդ խմբի ներկայացուցիչների 31%-ը կարծում է, որ վարկերը չի հասցնի մարել նախքան իր մահը, փոխանցում է Informing-ը:
Իհարկե, նման միտումներն այնքան էլ չեն կաշկանդում ամերիկացիներին, քանի որ ԱՄՆ օրենսդրության համաձայն՝ մահից հետո պարտքերը ժառանգաբար չեն փոխանցվում մեռնողի հարազատներին:
Մասնագետները նաեւ նշել են, որ քաղաքացիների եկամուտների եւ վարկերը չմարելու մտավախությունների միջեւ կապ չի նկատվել: Օրինակ, տարեկան 75 հազար դոլար եւ ավելի եկամուտ ունեցողները նույնպես վախենում են, որ չեն հասցնի վարկերը մարել:
Մասնագետ վերլուծաբանները նաեւ պարզել են, որ Ամերիկայում ամենատարածվածը անշարժ գույքի եւ կրթության համար վերցվող վարկերն են: Բացի այդ, ամերիկացիները ավելի շահավետ պայմաններով հիփոթեքը ստանալու համար վարկային դրական պատմություն են ստեղծում:
