նախընտրելի դարձնել
Ղազախստանում Ռուսաստանի Դաշնության դեսպան Միխայիլ Բոչարնիկովը հայտարարել է, որ բոլոր «անհարթությունները», որոնք ուղեկցում են Եվրասիական տնտեսական միության (ԵՏՄ) ստեղծման գործընթացը, կհաղթահարվեն, երբ ներդաշնակեցվեն ազգային օրենսդրությունները, ընդհանուր նորմերը եւ օրենքները, հաղորդում է «ՌԻԱ նովոստին»:
«Ցանկացած խոշոր ինտեգրացիոն միության ստեղծում չի կարող կատարյալ անցնել՝ առանց որեւէ անհարթությունների: Որոշակի ժամանակ է անհրաժեշտ ազգային օրենսդրությունների ներդաշնակեցման, ընդհանուր նորմերի եւ օրենքների համապատասխանեցման համար, որոնք կարգավորում են առկա «նեղ մասերը»,-հայտարարել է նա:
Դիվանագետը նաեւ անդրադարձել է Ղազախական ապրանքների դեպի Ռուսաստան արտահանման ծավալների նվազեցման հարցին՝ նշելով, որ հիմնականում տեղի է ունենում գնային արժեքների անկում, ինչը պայմանավորված է միջազգային շուկայում հումքի գների անկման հետ:
Դիվանագետը նշել է, որ անկախ ՌԴ-ի եւ Արեւմուտքի երկրների միջեւ ընթանող պատժամիջոցային ընդհարումներից, ռուբլու թուլացումից եւ այլ բացասական գործոններից, որոնք անուղղակի ձեւով բացասաբար են ազդում Ղազախստանի տնտեսության վրա, Աստանան չի արգելակում ԵԱՏՄ-ի ստեղծման գործընթացը:
«Ես նույնիսկ կասեի, որ ԵԱՏՄ-ի ստեղծումը նման բարդ պայմաններում միայն կոփում է մեր երկրները եւ տնտեսությունները՝ ապացուցելով հետագա զարգացման համար ընտրված ուղու իրավացիությունը»,-նշել է դեսպանը:
Հիշեցնենք, որ Ռուսաստանը, Բելառուսը եւ Ղազախստանը 2014թ. մայիսի 29-ին Աստանայում ստորագրել էին Եվրասիական տնտեսական միության մասին պայմանագիրը, որը ուժի մեջ է մտել 2015թ. հունվարի 1-ից: Հունվարի 2-ից ԵԱՏՄ-ին է միացել Հայաստանը, իսկ մայիսին սպասվում է Ղրղզստանի անդամակցումը:
