Լիբանանի «Notre Dame» համալսարանի ղեկավարության եւ Հայոց ցեղասպանության 100-րդ տարելիցի Լիբանանի կենտրոնական մարմնի համատեղ ջանքերով ու Լիբանանում ՀՀ դեսպանության աջակցությամբ, մարտի 20-ին  կայացավ համաժողով` նվիրված Հայոց ցեղասպանության 100-րդ տարելիցին:

Համաժողովին, որն ուղիղ եթերով հեռարձակվում էր լիբանանյան «OTV» հեռուստաալիքով, ներկա էին նախարարներ, խորհրդարանի պատգամավորներ, կրոնական առաջնորդներ, քաղաքական կուսակցությունների ղեկավարներ, դիվանագետներ, մտավորականներ, լրագրողներ, ուսանողներ:

Ներկաներին ուղղված իր ողջույնի խոսքում համալսարանի դոկտոր Նատա Սաատ Սապերը նշեց, որ այս տարի Հայոց ցեղասպանության 100-րդ տարելիցն է, ու չնայած պատմական անժխտելի փաստերին ու վկայություններին` Թուրքիան շարունակում է ուրանալ:

Հայոց ցեղասպանության 100-րդ տարելիցի Լիբանանի կենտրոնական մարմնի ատենապետ Սեդա Խտըշյանը հակիրճ ներկայացրեց Հայոց ցեղասպանության պատմությունը: Նա ընդգծեց, որ այս հանդիսությունը միայն նահատակների հիշատակի համար չէ, այլ հաղթանակի տոնախմբություն է, մեր ազգի ուժի ու ապրելու կամքի արտահայտություն: Բանախոսը, եզրափակելով իր խոսքը, նշեց, որ հայ ժողովուրդը պետք է շարունակի վերականգնել արդարությունն ու ճշմարտությունը` ստեղծագործելով եւ փոխանցելով իր հարուստ պատմությունն աշխարհին:

Համալսարանի փոխնախագահ Սուհել Մաթարն անդրադարձավ հայ ժողովրդի պատմությանն ու Հայոց ցեղասպանությանը` խոսելով Օսմանյան կայսրությունում իրականացված ջարդերի մասին եւ հիշատակելով երիտթուրքերի, ապա Աթաթուրքի վարած քաղաքականությունը: Դոկտոր Մաթարն իր ելույթը եզրափակեց հետեւյալ խոսքերով. «100-րդ տարելիցը թող նոր դուռ բացի հայ ազգի համար՝ դեպի խաղաղություն եւ արդարություն»:

Լիբանանում ՀՀ դեսպան Աշոտ Քոչարյանն իր խոսքում անդրադարձավ հայ ժողովրդի հարուստ մշակույթին ու պատմությանը, մի ժողովրդի, որը կրելով բազմաթիվ զրկանքներ եւ կորուստներ` միշտ պայքարել է հանուն լեզվի, կրոնի եւ արժեքների պահպանման: Դեսպանը ներկայացրեց մանրամասներ մեծ պատմական արժեք ներկայացնող հայկական խաչքարերի պատմության, ինչպես նաեւ հայ ժողովրդի պատմամշակութային արժեքների հանդեպ Օսմանյան կայսրությունում եւ Ադրբեջանի տարածքում իրականացված մշակութային ցեղասպանության փաստերի վերաբերյալ: Նա կարեւորեց Համահայկական հռչակագրի ընդունումը, ինչը հայ ժողովրդի միասնության եւ համախմբվածության արդյունք է: Դեսպանն ընդգծեց, որ հայ ժողովուրդը, անցնելով վերածնվելու եւ ազատագրվելու հերոսական ու փառահեղ ուղին, նշում է կյանքի հաղթանակը մահվան հանդեպ: Եզրափակելով իր խոսքը` դեսպանը շեշտեց, որ հայ ժողովուրդը շարունակելու է պայքարը պատմական արդարության վերականգման, համաշխարհային ճանաչման, դատապարտման եւ Ցեղասպանության բոլոր հետեւանքների վերացման ուղղությամբ:

Պաշտոնական ելույթներից հետո միջոցառման մասնակիցները համալսարանի բակում ներկա գտնվեցին Հայոց ցեղասպանության 100-րդ տարելիցին նվիրված խաչքարի տեղադրման արարողությանը:

Բարերար, խաչքարի տեղադրման նախաձեռնող Սարգիս Բուդաքյանը, շեշտեց, որ հայրենիքի նկատմամբ սերն ու հավատարմությունն է, որ համախմբել է ձեռնարկի բոլոր մասնակիցներին: Նա նշեց, որ խաչքարը երախտագիտության հավաստիք է հայերի կողմից Լիբանանի ժողովուրդի նկատմամբ, որը գրկաբաց ընդունեց եւ ձեռք մեկնեց գաղթական հայորդիներին: