Գեղարքունիքի մարզում ապրիլի 10-ին ուժեղ քամուց տուժել է 22 համայնք՝ այլ շինություններ համատեղ վերցրած, իսկ պատճառած վնասի չափը նախնական կազմում է 24 մլն 130 հազար դրամ: Այս մասին NEWS.am-ին ասաց Գեղարքունիքի մարզպետ Ռաֆիկ Գրիգորյանը:

Նա հայտնեց, որ քամու պատճառած վնասները հիմնականում վերականգնվել են:

«Հենասյուները, օժանդակի շինությունների ծածկերն ամբողջությամբ վերականգնվել են: Բնակելի տների տանիքները նույնպես փոխվել են: Միայն Վարդենիսի բազմաբնակարան շենքերի տանիքներն են մնացել: Դրանք էլ շուտով կարվեն»,- ասաց մարզպետը:

Նա նշեց, որ վնասի փոխհատուցման խնդրանքով կառավարությանը չեն դիմել, ամեն ինչ արել են տեղական ուժերով:

«Համայնքապետարաններն ու գյուղապետարանները որոշակի միջոցներ են  հատկացրել: Բացի դրանից՝ վերանորոգումների մի մասն էլ արվել է հին նյութերի միջոցով»,- ասաց մարզպետը:

Նշենք, որ ապրիլի 10-ին վաղ առավոտյան Գեղարքունիքի մարզում ուժեղ քամու հետեւանքով վնասվել եւ պոկվել են տան տանիքներ, շրջվել են հենասյուներ: Մարզպետարանում կազմվել էր հանձնաժողով` վնասի չափերը ճշտելու համար: