նախընտրելի դարձնել
«Ծաղկաձոր Մարիոթ» հյուրանոցային համալիրի աշխատակիցները կրկին հյուրընկալվել են Հրազդան քաղաքի Վ. Սարոյանի անվան №11 հիմնական դպրոցի հատուկ կրթության ստորաբաժանման աշակերտների մոտ եւ նրանց մասնակցությամբ ծառատունկ կազմակերպել դպրոցի շրջակայքում՝ ավելացնելով դպրոցին հարակից կանաչ տարածքները եւ գեղեցկացնելով այգին:
Ակցիայի նպատակն է մշտապես ուշադրության կենտրոնում պահել հատուկ խնամքի կարիք ունեցող երեխաներին, աջակցել հատուկ դպրոցի տնօրինությանը եւ ուսուցիչներին, որոնք մեծ ջանք ու եռանդ են ներդնում երեխաների կրթության եւ դաստիարակման գործում:
«Ծաղկաձոր Մարիոթ» հյուրանոցային համալիրը, ավանդույթ դարձնելով, կշարունակի նմանատիպ միջոցառումները, որոնք կհիշեցնեն մանուկներին, որ իրենք սիրված են եւ մշտապես ուշադրության կենտրոնում, իսկ նրանց մասնակցությունը ծառատունկին էլ ավելի կմոտեցնի սաներին բնությանը:
Հյուրանոցային համալիրը անցած տարվա ընթացքում նաեւ դրամահավաք է կազմակերպել, որի միջոցով նախատեսվում է մինչեւ սեպտեմբերի 1-ը վերանորոգել դպրոցի հանգստի սրահը:
«Գազպրոմ Արմենիա» ՓԲԸ-ի «Ծաղկաձոր Մարիոթ» հյուրանոցային համալիրի կառավարումը իրականացնում է MARRIOTT ընկերությունը, որը, որպես հյուրանոցային կառավարման պատասխանատու, առաջնահերթություն է համարում օգնել այն համայնքներին, որտեղ գործունեություն է ծավալում, քանի որ հզոր միջավայրն ու քաղաքը հասարակության բարեկեցության գրավականն են:
