Հունիսի 3-ին՝ Չեխիա կատարած պաշտոնական այցի վերջին օրը,  Պրահայի արքեպիսկոպոսարանում վարչապետ Հովիկ Աբրահամյանը հանդիպել է Պրահայի արքեպիսկոպոս  Կարդինալ Դոմինիկ Դուկայի հետ:

Շնորհակալություն հայտնելով ջերմ ընդունելության համար՝ Հովիկ Աբրահամյանը բարձր   է գնահատել Հայաստանի եւ Չեխիայի միջեւ բարեկամական հարաբերությունների խորացումը  եւ այս համատեքստում կարեւորել  Հայ առաքելական եկեղեցու եւ չեխ կաթոլիկ եկեղեցու համագործակցությունը: Վարչապետը  շնորհակալություն է հայտնել, որ չեխ կաթոլիկ եկեղեցին Պրահայի կենտրոնում գտնվող Սուրբ Յիլիի  տաճարը տրամադրում է հայկական ժամերգությունների եւ պատարագների անցկացման համար եւ  իր երախտագիտությունն է հայտնել  Կարդինալին Չեխիայում Հայոց ցեղասպանության ճանաչման գործընթացին եւ Ցեղասպանության 100–րդ տարելիցի կապակցությամբ կազմակերպված միջոցառումներին ցուցաբերած աջակցության համար:

Ողջունելով Հովիկ Աբրահամյանին` Կարդինալ Դուկան բարձր է գնահատել  Հայաստանի վարչապետի պաշտոնական այցը Չեխիայի Հանրապետություն եւ  կարեւորել այն հայ-չեխական բարեկամության ամրապնդման եւ խորացման համատեքստում:  Նրա խոսքով՝ մեծ պատիվ է ընդունել քրիստոնեությունը որպես պետական կրոն առաջինն ընդունած եւ աշխարհի ամենահին ազգերից մեկի ներկայացուցիչներին եւ  անգնահատելի համարել հայ ժողովրդի ներդրումը համաշխարհային հոգեւոր եւ մշակութային ժառանգության մեջ:

Հանդիպման ընթացքում կողմերը քննարկել են այլ հարցեր եւս, անդրադարձել տարածաշրջանային խնդիրներին: