նախընտրելի դարձնել
Երեւանի Ոստիկանության Մալաթիայի բաժնում բերման ենթարկված 25 քաղաքացիական ակտիվիստների դեռ ազատ չեն արձակել: NEWS.am-ի թղթակիցը հաղորդում է, որ ոստիկանության բաժին է ժամանել նաեւ ՄԻՊ աշխատակիցը: ՄԻՊ աշխատակիցը բանակցում է, որ բերման ենթարկվածներին ազատ արձակեն եւ ծանուցագրոց հրավիրեն ոստիկանություն:
Ոստիկանության բաժնի մոտ բերման ենթարկվածների հարազատները սնունդ են գնել եւ փոխանցել բաժնում գտնվող իրենց հարազատներին:
Նշենք, որ ոստիկանության Մալաթիայի բաժնի մոտ է նաեւ հաղորդավար Արման Մարգարյանը, որը իր ընկերոջ՝ Աշոտ Սարգսյանին է սպասում:
Նշենք, որ չորս օր տեւած նստացույցից հետո հունիսի 22-ին ավարտվել էր «Ոչ թալանին» նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկաննեը փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել են ցույցը, ապա բերման ենթարկել ակտիվիստների եւ լրագրողների:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
Հիշեցնենք, որ ոստիկանության բաժիններ են տարվել «Հետքի», «Գալա» հեռուստաընկերության, «Հայկական Ժամանակ» օրաթերթի, news.am-ի եւ panarmenian.net-ի լրագրողները: Բախումների հետեւանքով հիվանդանոց բուժօգնության է դիմել 18 հոգի, 237 քաղաքացի բերման է ենթարկվել: Հարուցվել է քրեական գործ ՔՕ-ի 258-րդ հոդվածի 1-ին մասի հատկանիշներով՝ խուլիգանություն:
