Երեւան քաղաքի Դավթաշեն  վարչական շրջանի թիվ 192 հիմնական դպրոցն անվանակոչվելու է Խորհրդային Միության հայտնի հայ հետախույզ  Գեւորգ Վարդանյանի անունով: Որոշումը կայացվել է այսօր՝ սեպտեմբերի 8-ին գումարված Երեւանի ավագանու 6-րդ նստաշրջանի առաջին նիստում:

Նիստը վարել է Երեւանի քաղաքապետ Տարոն Մարգարյանը, օրակարգը եւ հաշվիչ հանձնաժողովի կազմը հաստատելուց հետո ավագանու անդամները միաձայն կողմ քվեարկությամբ հավանություն են տվել ՀՀ ժողովրդական արտիստ Կիմ  Երիցյանի  հիշատակը հավերժացնող  հուշատախտակը  Վարդանանց  փողոց,  2-րդ  նրբանցք  հ.  4  հասցեում փակցնելու մասին որոշման նախագծին:

Ավագանու միաձայն հավանությանն են արժանացել նաեւ Երեւան քաղաքի Դավթաշեն  վարչական շրջանի հ.192 հիմնական դպրոցը Խորհրդային Միության հայտնի հայ հետախույզ  Գեւորգ Վարդանյանի, ինչպես նաեւ Երեւանի «Նուբարաշեն թաղային համայնքի երաժշտական  դպրոց» ՊՈԱԿ-ը ՀՀ վաստակավոր արտիստ, պրոֆեսոր Վիլլի Մոկացյանի անուններով անվանակոչելու մասին որոշման նախագծերը:

Երեւանի ավագանին որոշել է նաեւ Ռուսաստանի Դաշնության Սանկտ-Պետերբուրգ  քաղաքից  որպես նվիրատվություն ընդունել մայրաքաղաքի Արաբկիր վարչական շրջանում տեղադրված «Պաշարված Լենինգրադի երեխաները» հուշարձանը:

Ավագանին ձայների մեծամասնությամբ հավանություն է տվել նաեւ Երեւան քաղաքի  ավագանու «Երեւանի քաղաքային համայնքում տեղական վճարների դրույքաչափերը սահմանելու մասին» որոշման մեջ փոփոխություն եւ լրացումներ կատարելու մասին որոշմանը:

Միաձայն կողմ քվեարկությամբ ավագանին հաստատել է նաեւ 2015  թվականի  հուլիսի  1-ի  դրությամբ  կազմված Երեւան քաղաքի հողային հաշվեկշիռը:

Ավագանու նիստի օրակարգում ընդգրկված մյուս հարցերը նույնպես արժանացել են ավագանու հավանությանը:

Որոշվել է Երեւանի ավագանու հերթական հաջորդ նիստը գումարել հոկտեմբերի 28-ին: