Բունդեսթագը ուրբաթ քվեարկել է այնպիսի օրենքի օգտին, որը որոշ պայմանների առկայության դեպքում թույլ է տալիս օգնել կյանքից ինքնակամ հեռանալ ցանկացող մարդկանց, տեղեկացնում է  AP լրատվական գործակալությունը։

Օրենքի համաձայն, քաղաքացիները, այդ թվում նաեւ՝ անբուժելի հիվանդի հարազատները իրավունք ունեն աջակցել էվթանազիայի անցկացմանը «անհատական հիմքի վրա, այլասիրական դրդապատճառներից ելնելով»։

Սակայն օրենքը միաժամանակ արգելում է առեւտրական հիմքի վրա նպաստել էվթանազիային։ Օրենքի այդ բաժինը խախտողին կսպառնա մինչեւ երեք տարվա ազատազրկում։ 

Օրենքի ընդունման օգտին արտահայտվել է 360 պատգամավոր, դեմ՝ 233, տեղեկացնում է «Ինտերֆաքսը»։

Էվթանազիայի մասին օրենքի այդ վարկածին ավելի վաղ հավանություն էր տվել Գերմանիայի կանցլեր Անգելա Մերկելը եւ Բունդեսթագում տարբեր կուսակցությունների ներկայացուցիչներ։ 

 Գերմանիայի արդարադատության նախկին նախարար Բրիգիտե Ցիպրասը քննադատության է ենթարկել օրենքը իրավաբանական ձեւակերպումների անորոշության համար եւ հավելել, որ դրա իրավաչափությունը կվիճարկվի Գերմանիայի Սահմանադրական դատարանում։ 

Ինչպես նշում է AP-ը, էվթանազիան Գերմանիայի համար հատկապես նուրբ հարց է, որովհետեւ վերջին անգամ այդ պրոցեդուրան թույլատրվել է նացիստների օրոք։  Այդ ժամանակ սպանվել է ֆիզիկական թերություններով եւ հոգեկան խանգարումներով ավելի քան 200 հազար մարդ։