Երեւանում   այսօր` նոյեմբերի 6-ին,  91-ամյա կնոջը շահադիտական դրդումներով  սպանելու մեջ կասկածվող Ա.Կարապետյանը խոստովանական ցուցմունք է տվել: Նա իր ցուցմունքում նշելէ, որ գտնվել է իր տատի՝ Սիրանուշ Կարապետյանի տանը, որտեղ եւ ապակյա շշերով հարվածներ հասցնելով ննջասենյակի մահճակալին պառկած տարեց կնոջ գլխի շրջանին՝ հափշտակել է նրա ոսկյա ականջօղերը եւ կանխիկ գումար:

ՀՀ քննչական կոմիտեի Երեւան քաղաքի քննչական վարչության Քանաքեռ-Զեյթուն վարչական շրջանի քննչական բաժնում հարուցվել է քրեական գործ՝ 91-ամյա կնոջ՝ շահադիտական դրդումներով, ավազակությամբ կատարված սպանության դեպքի առթիվ:

  2015 թվականի նոյեմբերի 05-ին՝ ժամը 22:50-ին, ահազանգ է ստացվել, որ Երեւան քաղաքի Կամարակ փողոցի 1-ին նրբանցքի տներից մեկում հայտնաբերվել է տարեց կնոջ՝ 1924թ. ծնված  Սիրանուշ Կարապետյանի դին:

Դեպքի վայր է մեկնել քննչական-օպերատիվ խումբը: Դիակի արտաքին զննությամբ՝ գլխի ձախից կողմնածոծրակային շրջանում հայտնաբերվել են վնասվածքներ:

Դեպքի առթիվ ՀՀ քննչական կոմիտեի Երեւան քաղաքի քննչական վարչության Քանաքեռ-Զեյթուն վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 8-րդ կետով (շահադիտական դրդումներով, ավազակությամբ կատարված սպանություն):

Նախնական քննությամբ պարզվել է, որ դեպքը տեղի է ունեցել 2015թ. նոյեմբերի 4-ի ժամը 18:10-ից մինչեւ նոյեմբերի 5-ի ժամը 22:50-ն ընկած ժամանակահատվածում: Կատարված քննչական բազմաթիվ գործողությունների արդյունքում պարզվել է առերեւույթ հանցագործություն կատարած անձի ինքնությունը, ով հանդիսանում է Սիրանուշ Կարապետյանի թոռը՝ 1987թ. ծնված Ա.Կարապետյանը: Վերջինս ձերբակալվել է՝ սպանությունը կատարելու կասկածանքով:

Նախաքննությունը շարունակվում է:

Ձեռնարկվում են անհրաժեշտ քննչական եւ դատավարական գործողություններ՝ դեպքի բոլոր հանգամանքները պարզելու ուղղությամբ։