Մարդիկ հիասթափված են եւ համոզված չեն, որ նոր Սահմանադրությամբ  իրավիճակ է փոխվելու։  Այս մասին NEWS.am-ի թղթակցի հետ զրույցում նշել է ՀՀԿ խմբակցության պատգամավոր Աշոտ Աղաբաբյանը՝ հավելելով, որ նման կարծիքի է հանգել իր  ընտրատարածքում մարդկանց հետ շփվելով:

«Իմ ընտրատարածքում բոլորն էլ պատրաստ են  ընտրությունների, իհարկե դժգոհություններ կան՝ բավականին  լուրջ, բայց  դժգոհությունները  ոչ թե սահմանադրական փոփոխության հետեւանքով են, այլ մարդիկ հիասթափված են, ասում են՝ ի՞նչ է փոխելու որ  նոր Սահմանադրությունը։ Եթե  հարյուր տոկոսով իմանան, որ բան է փոխվելու, հաստատ բոլորն էլ «այո» կասեն»,-ասել է պատգամավորը։

Նա վստահեցրել է, թե որպեսզի համոզվեն, որ լավ է լինելու, ինքն այդ ուղղությամբ աշխատում է, եւ որպես աշխատանք՝ հիշատակել  է պատգամավորական տարիներին իր ընտրողներին ցուցաբերած աջակցությունը։

«Իհարկե, հաջողվում է համոզել, 13 տարի է կապ ունեմ իմ ընտրողների հետ, ոնց որ ընտանիք լինենք»,-նշել է պատգամավորը։

Նշենք, որ Աշոտ Աղաբաբյանը մեծամասնական համակարգով պատգամավոր է ընտրվել  թիվ 33 ընտրատարածքից, որը  ներառում է Շիրակի մարզի Աշոցքի եւ Ամասիայի տարածաշրջանի գյուղերը:

Սահմանադրական փոփոխությունների դեպքում անցում կկատարվի 100-տոկոսանոց համամասնական ընտրակարգի, ինչը նշանակում է, որ տեղերում պատգամավորներ չեն ընտրվելու: