Հարյուրավոր ամերիկացիներ սոցցանցերն օգտագործում են   «Իսլամական պետության» գրոհայիններին իրենց աջակցությունը հայտնելու համար, գրում է  The Guardian թերթը` վկայակոչելով Ջորջ Վաշինգթոնի անվան համալսարանի հետազոտությունը: 

Հետազոտության մեջ վերլուծվում են իսլամիստներին աջակցող ավելի քան չորս հարյուր ակտիվիստ-օգտատիրոջ համացանցային էջերն ու փաստաթղթերը: Արդյունքները ցույց են տալիս, որ ԻՊ-ի ամերիկացի կողմնակիցների միջին տարիքը   26 է: Նրանց ընդամենը  14 տոկոսն են կազմում կանայք: Կեսից ավելին եղել է  այլ երկրներում: Ամեն հինգ ակտիվիստից երկուսը նորահավատ մահմեդական է:  

Հետազոտողներն այն եզրակացության են հանգել, որ սոցցանցերն առանցքային դեր են խաղում ԻՊ-ի գրոհայինների արմատականացման եւ հավաքագրման գործում:  Նրանք    Twitter-ը ճանաչել են որպես գլխավոր համացանցային հարթակ, որը ջիհադիստներն օգտագործում են նոր կողմնակիցների հավաքագրման համար, գրում է   Gazeta-ն:

«Սա համացանցային ընկերակցություն է` տարբեր դերերով եւ անհատականություններով: Ջասթին Բիբերի երկրպագուների ընկերակցության նման  է: Նրանք անընդհատ ծավալվում են եւ անհամեմատ ավելի լավ են համակարգված,  քան կարծում էինք», — ասել է զեկույցի համահեղինակ Լորենցո Վիդինոն:

Նրա խոսքով, Twitter-ում ԻՊ-ի կողմնակիցները երեք տեսակի են` նրանք, ովքեր ստեղծում են հիմնական բովանդակությունը, նրանք, ովքեր դրանք վերատեղադրում են եւ ովքեր անձնական էջեր են զարգացնում:

Twitter ընկերության ներկայացուցիչը հրաժարվել է մեկնաբանել զեկույցի արդյունքները, բայց հիշեցրել է, որ ծառայության քաղաքականությունը ենթադրում է, որ օգտատերերն իրավունք չունեն սպառնալիք տարածել կամ հավանություն տալ բռնությանը: