Անցած տարվա փետրվարի 28-ին զոհված փոխգնդապետ Արտակ Աղեկյանի ընտանիքը մոտ մեկ տարի է՝ վարձով էր բնակվում Երեւանում: Այս մասին NEWS.am-ի թղթակցին հայտնեցին Աղեկյանի հարազատները՝ անդրադառնալով նախօրեին Երեւանի ավագանու կայացրած որոշմանը, համաձայն որի՝ հակառակորդի դիվերսիայի ժամանակ զոհված փոխգնդապետի ընտանիքին մայրաքաղաքում բնակարան հատկացվեց: 

«Արտակ Աղեկյանն ընտանիքի հետ Մատաղիսում էր բնակվում, այնտեղ ծառայողական բնակարան էին հատկացրել: Բնականաբար, նրա զոհվելուց հետո ընտանիքը հանձնեց բնակարանն ու տեղափոխվեց Երեւան: Երեկ էլ արդեն Երեւանի քաղաքապետարանը բնակարան հատկացրեց»,- ասացին հարազատները:

Աղեկյանը երկու մանկահասակ երեխա ունի:

Ավելի վաղ հայտնել էինք, որ 2015-ի փետրվարի 28-ին՝ ժամը 14:25-ի սահմաններում, ՊԲ հյուսիսարեւելյան ուղղությամբ տեղակայված զորամասերից մեկի պահպանության տեղամասի մարտական հենակետերի ուղղությամբ հակառակորդը ձեռնարկել է դիվերսիոն հետախուզական ներթափանցման փորձ: ՊԲ առաջապահ ստորաբաժանումները ժամանակին հավաստանշել են հակառակորդի հատուկ ջոկատայինների առաջխաղացումը եւ վերջիններիս կորուստներ պատճառելով, հետ շպրտել ելման դիրքեր: Ծավալված մարտերի ժամանակ զոհվել են զինծառայողներ, 36-ամյա Արտակ Աղեկյանը եւ 20-ամյա Հայկ Բարոյանը:

Արտակ Աղեկյանը Տաշիր քաղաքից էր, ամուսնացած էր, ունի երկու երեխա՝ աղջիկ եւ տղա: Նա Զինված ուժերում էր 1996 թվականից:

Փոխգնդապետը զոհվել է՝ փորձելով փրկել 20-ամյա զինծառայողի կյանքը: