նախընտրելի դարձնել
2016 թ. փետրվարի 16-ի նիստում ԿԲ խորհուրդը որոշեց իջեցնել վերաֆինանսավորման տոկոսադրույքը 0.25 տոկոսային կետով՝ սահմանելով այն 8.5%:
2016 թ. հունվարին արձանագրվել է 2.2% գնաճ՝ նախորդ տարվա նույն ամսվա 2.5%-ի դիմաց, որի պարագայում 12-ամսյա գնաճը փոքր-ինչ նվազել է՝ ամսվա վերջին կազմելով -0.4%: Գնաճի ցածր մակարդակը գրեթե ամբողջությամբ պայմանավորված է նախորդ տարվա նույն ժամանակահատվածի համեմատ գյուղմթերքների գների նվազմամբ եւ արտաքին հատվածից ներքին գների վրա մասամբ փոխանցված գնանկումային ազդեցությամբ:
Արտաքին հատվածում վերջին շրջանում արձանագրված միտումներն էապես չեն փոխվել. համաշխարհային տնտեսությունն աճել է համեմատաբար դանդաղ տեմպերով, իսկ միջազգային ապրանքային շուկաներում շարունակվել է գների նվազումը: ԿԲ խորհուրդը գնահատում է, որ այս միտումները կպահպանվեն նաեւ առաջիկա ամիսներին, ինչը ներքին գների վրա կշարունակի ունենալ գնանկումային ազդեցություն:
2015 թ-ի տնտեսական աճը գնահատվում է 3.2%-ի շրջանակներում, որին հիմնականում նպաստել է գյուղատնտեսության եւ հանքարդյունաբերության ճյուղերում գրանցված աճը: Չնայած տարվա ընթացքում Կենտրոնական բանկը եւ Կառավարությունն իրականացրել են խթանող քաղաքականություններ, այնուամենայնիվ, ներքին պահանջարկը շարունակում է մնալ թույլ: ԿԲ խորհուրդը գնահատում է, որ կարճաժամկետ հատվածում ՀՀ տնտեսությունից եւ արտաքին հատվածից գնաճային էական ճնշումներ չեն ակնկալվում, որի ներքո կպահպանվի թույլ գնանկումային միջավայրը: Ներկա տնտեսական իրավիճակում ցածր գնաճը կնպաստի եկամուտների գնողունակության պահպանմանը, ինչպես նաեւ գնաճային սպասումների աստիճանական նվազմանը:
Այս պարագայում ԿԲ խորհուրդը նպատակահարմար է գտնում շարունակել դրամավարկային պայմանների թուլացումը: Ընդ որում, դեռեւս պահպանվող համեմատաբար բարձր գնաճային սպասումների պարագայում` նվազման ուղղությամբ գնային կոշտությունների եւ դոլարայնացման ավելացման ռիսկի ներքո ԿԲ խորհուրդը կարեւորում է դրամավարկային պայմանների աստիճանական թուլացումը: ԿԲ խորհուրդն արձանագրում է, որ առաջիկա ամիսներին դեռեւս կպահպանվի ցածր գնաճային միջավայր, այնուհետեւ, պայմանավորված 2015 թ-ից շարունակվող դրամավարկային պայմանների զգալի թուլացմամբ, այն աստիճանաբար կընդլայնվի եւ կանխատեսվող հորիզոնում կմոտենա նպատակային ցուցանիշին:
Տնտեսական սպասվող զարգացումների, ինչպես նաեւ արտաքին եւ ներքին լրացուցիչ ռիսկերի դրսեւորման բացակայության պարագայում ԿԲ խորհուրդը հետագայում եւս կշարունակի դրամավարկային պայմանների թուլացումը:
Լոմբարդային ռեպոների եւ բանկերից ներգրավվող միջոցների տոկոսադրույքները սահմանվել են համապատասխանաբար 10% եւ 7%:
