ՀՀ գլխավոր դատախազության կոռուպցիոն եւ տնտեսական գործունեության դեմ ուղղված հանցագործությունների գործերով վաչության պետի զեկուցագրի հիման վրա նապատրաստված նյութերի ուսումնասիրությամբ պարզվել է, որ 2013թ. ապրիլի 17-ին Բագրատաշենի մաքսային կետով «Mercedes-Benz S550» մակնիշի ավտոմեքենան ներմուծվել է ՀՀ, որից հետո 2013 թվականի օգոստոսի 28-ին ավտոտրանսպորտային միջոցների մաքսային ձեւակերպումների մասնագիտացված մաքսատանը հայտարարագրվել է 15մլն. 669հազ. 690 ՀՀ դրամ մաքսային արժեքով, «ժամանակավոր ներմուծում» մաքսային ռեժիմով` 15 օր ժամկետով:

ՀՔԾ-ից NEWS.am-ին հայտնում են, որ այնուհետեւ հիշյալ ավտոմեքենան հայտարարագրվել է նույն մաքսային կետում «վերաարտահանում» մաքսային ռեժիմով: Ըստ փաստաթղթերի, իբր, 2013թ. սեպտեմբերի 22-ին՝  ժամը 18:33-ին, քաղաքացի Ա. Ա.-ն Բագրատաշենի հսկիչ-անցագրային կետով նույն ավտոմեքենայով մեկնել է ՀՀ-ից:

Մինչդեռ 2014թ. նոյեմբերի 17-ին հիշյալ մեքենան հայտնվել է Երեւան քաղաքում: ՀՀ ՖՆ նախաբացթողումային հսկողության վարչության  աշխատակիցներն այն հայտնաբերել են «Ավտոդաս» ՍՊ ընկերության տարածքում` մասնատված վիճակում:

Նյութերի հետագա ուսումնասիրությամբ՝ ՀՀ ոստիկանության ինտերպոլի ազգային կենտրոնական բյուրո կատարված հարցմամբ պարզվել է, որ հիշյալ ավտոմեքենան 2010թ. հունվարի 1-ից մինչեւ 2015թ. փետրվարի 22-ն ընկած ժամանակահատվածում Վրաստանի պետական սահմանը չի հատել, քաղաքացի Ա. Ա.-ի կողմից 2013թ. սեպտեմբերի 22-ին Վրաստանի սահմանային անցակետերից որեւէ մեկով սահմանը հատելու վերաբերյալ տեղեկատվություն առկա չէ, ինչպես նաեւ ավտոմեքենան կրկին ՀՀ չի ներմուծվել:

Հատուկ ծառայություն իրականացնող անձանց կողմից առերեւույթ պաշտոնեական լիազորությունները չարաշահելու եւ պաշտոնեական կեղծիք կատարելու դեպքերի առթիվ ՀՀ հատուկ քննչական ծառայությունում ՀՀ քրեական օրենսգրքի 308-րդ եւ 314 հոդվածների 1-ին մասերով հարուցվել է քրեական գործ:

Կատարվում է նախաքննություն: