Քաղաքացիական ակտիվիստ Վարդգես Գասպարիին հնազանդեցնելու եւ նրա վերաբերմունքը դատական համակարգի նկատմամբ  պատժելու համար  են նրան կալանավորել: Այս մասին այսօր՝ փետրվարի 24-ին, լրագրողների հետ հանդիպմանն ասաց «Քաղաքացիական հասարակության ինստիտուտ» ՀԿ ղեկավար  Արման Դանիելյանը:

«Վարդգես Գասպարին մարտի 1-ի գործերով եւս դատապարտված է եղել, այն  ժամանակ էլ էին ակնհայտ շինծու գործով դատապարտել եւ չեմ կարծում, որ նրան կալանավորելով կկարողանան նրան հնազանդեցնել: Երբ ոստիկանությունն ակնհայտ բռնություն է գործադրում քաղաքացիների նկատմամաբ, նրանց ոչ ոք չի պատժում, բայց երբ ոստիկանությունը սադրում է ինչ-որ քաշքշուկ եւ քաղաքացիները ոստիկանին հանկարծ մի քիչ բռթում են, նրանց դատապարտում են»,-ասաց նա:

Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն էլ նշեց, որ քաղաքացիական ակտիվիստ Վարդգես Գասպարիի նկատմամբ որպես  խափանման միջոցը ընտրված է եղել ստորագրություն չհեռանալու մասին եւ  որեւէ փաստ չկա, որ Գասպարին խախտել է այն եւ նրան կալանավորել են:

«Դատարանն առավելագույնը նրա նկատմամբ կարող էր վարչական տուգանք սահմանել, հիմա առանց մարդու նրա նկատմամաբ խափանման միջոց են կիրառել: Տվյալ դեպքում մենք ունենք ակնհայտ  անհիմն որոշում, չպատճառաբանված: Վարդգես Գասպարիին կալանավորելը նաեւ քաղաքական բնույթ ունի, մարդուն ակնհայտորեն պատժում են իր դիրքորոշման եւ կարծիքի համար»,-ասաց նա:

Նշենք, որ փետրվարի 19-ին Շենգավիթի ընդհանուր իրավասության դատարանը կալանավորել է քաղաքացիական ակտիվիստ Վարդգես Գասպարիին:

Հիշեցնենք, որ այսօր Շենգավիթ վարչական շրջանի ընդհանուր իրավասության դատարանում պետք է տեղի ունենար Վարդգես Գասպարիի գործով դատական նիստը: Քաղաքացիական ակտիվիստը կտրականապես հրաժարվում է ներկայանալ դատարան, եւ դատավորը նրան կալանավորելու որոշում է կայացրել օրենքի խախտմամբ, առանց նրա ներկայության։