նախընտրելի դարձնել
2015 թվականի դեկտեմբերի 7-ին՝ ժամը 23:30-ի սահմաններում, Երեւան քաղաքի Հյուսիսային պողոտա 1 հասցեում քաղաքացիներ Հրանտ Գ.-ն եւ Գեւորգ Պ.-ն անհիմն վիճաբանության մեջ են մտել ՀՀ ոստիկանության ծառայող Սարգիս Խ.-ի հետ, եւ երբ վերջինս փորձել է կարգի հրավիրել նրանց, Գեւորգ Պ.-ն սպառնացել է բռնություն կիրառել Սարգիս Խ.-ի նկատմամբ:
ՀՔԾ-ից NEWS.am-ին հայտնում են, որ Հրանտ Գ.-ն եւ Գեւորգ Պ.-ն ոստիկանության ծառայողների կողմից հիշյալ վայրից բերման են ենթարկվել ոստիկանության Կենտրոնականի բաժին:
Դեպքի առթիվ ՀՀ ոստիկանության Կենտրոնականի բաժնում նախապատրաստված նյութերի հիման վրա ՀՀ քննչական կոմիտեի Կենտրոն եւ Նորք-Մարաշ վարչական շրջանների քննչական բաժնում ՀՀ քրեական օրենսգրքի 316-րդ հոդվածի 1-ին մասի հատկանիշներով հարուցված քրեական գործի նախաքննության ընթացքում Հրանտ Գ.-ն հայտնել է, որ դեպքի օրը` վիճաբանության ընթացքում, ոստիկանության ծառայողը ձեռքով մի քանի անգամ հրել է իրեն, որի արդյունքում վայր է ընկել: Այնուհետեւ վիճաբանությանը միջամտել է իր ընկեր Գեւորգ Պ.-ն, ում ոստիկանության նույն ծառայողը հարվածել է ոտքով, ինչի պատճառով նա եւս վայր է ընկել, որից հետո իրենք բերման են ենթարկվել ոստիկանության Կենտրոնականի բաժին:
Հետագայում գործի փաստական հանգամանքներով պայմանավորված՝ լրիվ, օբյեկտիվ եւ բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկվել ՀՀ հատուկ քննչական ծառայություն:
Նախաքննությունը շարունակվում է:
