ՀՀ քաղաքացի Վարդգես Գասպարիի նկատմամբ տեւական ժամանակ շարունակվող համակարգված հալածանքը հասել է գագաթնակետին: Այս մասին հայտարարություն է տարածել «Նոր Հայաստան» հանրային փրկության ճակատի Քաղաքական խորհուրդը:

Հայտարարությունում, նաեւ ասվում է.

«Վարդգես Գասպարիին բանտում նվաստացնելու եւ բռնության ենթարկելու, իսկ այնուհետեւ՝ հոգեբուժարան տանելու դեպքերը լակմուսի թղթի նման բացահայտեցին, որ վերջին շրջանում քաղբանտարկյալների քանակի աճը, մարդու իրավունքների սահմանափակումների անշեղորեն ավելացումը, ժողովրդավարական ինստիտուտների զրոյացումը, ընտրական համակարգի ամբողջական յուրացումը, սահմանադրական հանրաքվեի կեղծումը, թվացյալ բազմակուսակցականության ֆոնին միակուսակցական եւ համակարգային կոռուպցիայի վրա հիմնված քրեական ռեժիմի հաստատումը, քաղաքակիրթ աշխարհի հետ հարաբերություններում խաբեության քաղաքականության որդեգրումը, ինչպես նաեւ մի շարք այլ բնութագրական երեւույթները պարզապես փաստեր չեն:

Դրանք ապացույցներ են, որ Հայաստանում արդի պայմաններին հարմարված տարբերակով հաստատվում է նորստալինականության ռեժիմ, որի հետեւանքներն աղետալի են լինելու մեր քաղաքացիների, համայն հայության եւ նրա պետականության համար:

Այդ պատճառով խստորեն դատապարտելի է մեր երկրում խորհրդային անցյալի մղձավանջային իրողությունների վերարտադրության միտումը, ինչպես նաեւ այն զարգացնող վարչախմբի հետ կեղծ ընդդիմության բացահայտ կամ գաղտնի գործակցությունը:

«Նոր Հայաստան» հանրային փրկության ճակատն իր զորակցությունն է հայտնում մերօրյա ստալինականության զոհ դարձած ՀՀ քաղաքացի Վարդգես Գասպարիին եւ պահանջում է անհապաղ ազատ արձակել նրան, ինչպես նաեւ շնորհակալություն է հայտնում նրան աջակցող բոլոր քաղաքական, հասարակական եւ իրավապաշտպան կազմակերպություններին, իրավաբաններին եւ քաղաքացիներին:

«Նոր Հայաստան» հանրային փրկության ճակատը համոզված է, որ անցյալի մղձավանջը կրկնելու բոլոր փորձերը ձախողվելու են ժողովրդի ընդվզմամբ, իսկ դրանց հեղինակներն ու ջատագովները կանգնելու են ՀՀ անկախ դատարանի առաջ: