Տաղավարների բարձր վարձավճարների դեմ  փետրվարի 26-ին  բողոքի ակցիա իրականացրած Երեւանի «Մալաթիա» տոնավաճառի աշխատակիցները ստորագրահավաք կկազմակերպեն եւ կդիմեն գործարար Գագիկ Ծառուկյանին` «Առինջ մոլում» իրենց համար կանգնելու տեղ  հատկացնելու խնդրանքով: Այս մասին NEWS.am-ի հետ զրույցում ասաց տոնավաճառի աշխատակիցներից Արթուրը:

«Երեւի ստորագրահավաք կկազմակերպենք, կդիմենք Ծառուկյանին, որպեսզի մեզ  «Առինջ մոլում» տեղ հատկացնի, գնանք էդտեղ կանգնենք, տեսնենք ոնց կլինի, վաղվա ակցիայի ընթացքում կորոշենք: Թե չէ էսպես չի կարա շարունակվի, էս ինչ են անում, մենք ենք էդ շուկան զրոյից ստեղծել, մեր սեփական տարածքներն են, հիմա ասում են գնանք»,- ասաց Արթուրը:

Հիշեցնենք, որ Երեւանի «Մալաթիա» տոնավաճառի մի քանի հարյուր աշխատակիցներ փետրվարի 26-ին  գործադուլ են հայտարարել ու բողոքի ակցիա  անցկացրել տոնավաճառի մոտ` փակելով երթեւեկելի փողոցը: