Վարկ տրամադրելու որոշում կայացնելիս՝ բանկերը կուսումնասիրեն մարդու վարքագիծը սոցցանցերում, մասնավորապես տարբեր խմբերին նրա բաժանորդագրությունն ու լուսանկարները: Այս մասին փետրվարի 29-ին հայտնել է «Իզվեստիյա» թերթը:

Համապատասխան ծառայությունը ստեղծել է Վարկային պատմությունների ազգային բյուրոն (ՎՊԱԲ) Double Data IT- ընկերության հետ միասին:

Համակարգի օգտագործման առաջին փորձը, ըստ թերթի տեղեկությունների, ցույց է տվել, որ ցանցային մարկետինգի, արագ վարկերի կամ էլ հակակոլեկտորների մասին խմբերին մարդու բաժանորդագրությունը 2-4 անգամ ավելացնում է վարկերի չվճարման հավանականությունը: Ընդ որում սոցցանցի օգտատիրոջ դրական գործողությունները՝ օրինակ ճամփորդությունների մասին լուսանկարի հրապարակումը, հակառակը՝ նվազեցնում են ռիսկերը:

«Ֆիզանձերի վարկավորման դեպքում ռիսկերը նվազեցնելու նպատակով ապագայում պետք է նորարական լուծումներ կիրառվեն »,- ասել է ՎՊԱԲ-ի գլխավոր տնօրեն Ալեքսանդր Վիկուլինը: Նրա խոսքով, վարկատուի մրցունակ առավելություններից են վարկային բոլոր գործընթացների տեխնոլոգիական բարձր մակարդակը, նաեւ տեղեկությունների հսկայական զանգվածներ մշակելու կարողությունը: