Թուրքիայի հարավ-արեւելքում ուժայինների եւ քրդական աշխարհազորի դիմակայությունը սրվում է, գրում է ՌԻԱ Նովոստին` վկայակոչելով   Politico թերթին:

Թուրքական Քուրդիստանի ոչ պաշտոնական  մայրաքաղաք համարվող Դիարբեքիրի բնակիչները, որոնք լքել են քաղաքը, չէին կարողանում ճանաչել փողոցները, որոնցում մի ժամանակ ապրել էին. նեղ փողոցները բեկորներով են լցված, այրված տներից ծուխ է բարձրանում երկինք: 

Եվրոպան գործնականում ուշադրություն չդարձրեց բռնության այդ առկայծումների վրա, նշում է Politico-ն: Բրյուսելը Սիրիայում եւ Իրաքում հակամարտությունների եւ այնտեղից փախչող մարդկանց հետ կապված իր հոգսերն ունի, բայց քաղաքացիական պատերազմը Թուրքիայի որոշ հատվածներ վերածում է Սիրիայի շրջանները հիշեցնող տարածքների: Անկարան խնդիրներ ունի ոչ միայն սիրիացիների, այլեւ իրենց` թուրք փախստականների հետ. Թուրքիայում ԵՄ-ի ներկայացուցիչների գնահատականների համաձայն, օգոստոսից ի վեր ավելի քան  400 հազար մարդ փախել է իր բնակության վայրից: 

Միջազգային ճգնաժամային խմբի զեկույցի համաձայն, օգոստոսից ի վեր Թուրքիայի հարավ-արեւելքում առնվազն  250 քաղաքացի է սպանվել:  Դիարբեքիրից բացի, տուժել է նաեւ Ջիզրեն. տեղի իշխանությունների գնահատականով, քաղաքը լքել է նրա բնակիչներից 100- 120 հազար մարդ:

Եվրամիությունն Անկարային չի քննադատում ՔԲԿ-ի դեմ ռազմական գործողությունների համար, որին Բրյուսելը եւս ահաբեկչական կազմակերպություն է համարում, չնայած եվրոպական շատ երկրներ աջակցում են քրդական կուսակցության ռազմական թեւին. ժողովրդական ինքնապաշտպանության ջոկատներն առաջավոր գծում կռվում են ԻՊ-ի դեմ, նշում է պարբերականը: 

Շատերն արդեն փորձել են փախչել, հավելում է պարբերականը: Անցյալ ամիս Թուրքիայի առափնյա պահպանությունը Թուրքիայի 12 քրդի է հայտնաբերել աֆղանների եւ սիրիացիների խմբում, որը փորձում էր Հունաստան հասնել: Տեղի ԶԼՄ-ների տեղեկատվության համաձայն, նրանք իշխանություններին պատմել են, որ փախել են հարավ-արեւելքում ահաբեկչությունից: 

Ռազմական գործողությունները սրվում են, տեղափոխված անձանց թիվն աճում է, եզրակացնում է թերթը: Երբ մարտի սկզբին Թուրքիայի կառավարությունը հայտարարեց Շիրնակի շրջափակման սկզբի մասին, քաղաքի  63 հազար բնակչից   մոտավորապես  50 հազարը հեռացավ: