Նախընտրելի
Սեպտեմբերի 22-ին Հայաստանի Ազգային ժողովի նախագահ Հովիկ Աբրահամյանն ընդունել է Եվրոպական տարածաշրջանների ասամբլեայի (ԵՏԱ) պատվիրակությանը` ասամբլեայի նախագահ, Իլ դե Ֆրանս ռեգիոնի փոխնախագահ Միշել Սաբբանի գլխավորությամբ:
ԱԺ մամուլի ծառայությունից NEWS.am-ին հայտնում են, որ պատվիրակության կազմում էին Եվրոպական տարածաշրջանների ասամբլեայի գլխավոր քարտուղար Կլաուս Կլիպը եւ ԵԽ ԽՎ անդամ, Ֆրանսիայի Ազգային ժողովի հայ –ֆրանսիական բարեկամական խմբի փոխնախագահ Ռենե Ռոուքեն:
Եվրոպական տարածաշրջանների ասամբլեային անդամակցում են եվրոպական 33 երկրների 270 շրջաններ /կամ մարզեր/ եւ 16 միջռեգիոնալ կազմակերպություններ: Ասամբլեայի նախագահ Միշել Սաբբանը նշել է, որ շրջանների միջեւ փորձի, կարծիքների փոխանակումը նպաստում են ժողովուրդների փոխըմբռմանը եւ մերձեցմանը: Նա հույս է հայտնել, որ արդեն այս տարվա նոյեմբերին` Ստամբուլում կայանալիք վեհաժողովի ժամանակ Հայաստանի համայնքները ես կանդամակցեն իրենց կազմակերպությանը:
Հովիկ Աբրահամյանը կարեւորել է տեղական ինքնակառավարման մարմինների ու տարածաշրջանների համագործակցության գաղափարը եւ բարձր գնահատել Եվրոպական տարածաշրջանների ասամբլեայի գործունեությունը ու Հայաստանի համայնքների անդամակցությունը այդ կազմակերպությանը, ինչը կնպաստի ՏԻՄ-երի կառույցի ամրապնդմանը, միջհամայնքային եւ միջշրջանային համագործակցությանն ու առկա խնդիրների համատեղ լուծմանը: Հայաստանի խորհրդարանի ղեկավարը կարեւոր է համարել ՏԻՄ-երին լայն լիազորություններով օժտելը եւ համայնքների ուժեղացումը:
ՀՀ Ազգային ժողովի նախագահն առաջարկել է ԵՏԱ-ի շրջանակներում Հայաստանում անցկացնել կովկասյան տարածաշրջանի երկրների համայնքների կոնֆերանս:
