Նախընտրելի
Հալեպի հայկական թաղամասերը վերջին երկու օրերին ակտիվորեն ռմբակոծվում են, որը կապված է Գերմանիայի Բունդեսթագի կողմից Հայոց ցեղասպանությունը ճանաչող բանաձեւի ընդունման հետ: Այս մասին այսօր՝ հունիսի 4-ին, NEWS.am-ի հետ զրույցում ասաց Հալեպի Հայ ավետարանական համայնքի համայնքապետ, վերապատվելի Հարություն Սելիմյանը:
«Հալեպում հայկական թաղամասերի վրա ակտիվացել են ռմբակոծությունները, քաղաքը շատ լարված է, երկու օր առաջ տեղի ունեցավ ուժեղ ռմբակոծություն հայկական թաղամասերի վրա, որը, կարծում ենք, որ արդյունք է Բունդեսթագի ընդունած բանաձեւի: 4 հայ զոհվեց, որը մեզ համար մեծ կորուստ էր, տասնյակ վիրավորներ ունենք նաեւ, բացի այդ 7-8 շենք ամբողջությամբ քանդվել է: Այս բոլորը թուրքերի կողմից կատարված հարձակումներ են, այնտեղ, որտեղ թուրք զինյալներն են մնում, Հալեպի Նոր գյուղ թաղամասին շատ մոտ է: Նրանք այդ քայլով փորձեցին մեկ անգամ եւս վնասել հայ ժողովրդին»,-ասաց նա:
Հարություն Սելիմյանը նշեց նաեւ, որ լուրջ վնասներ է կրել հայ կաթողիկե համայնքին պատկանող Սուրբ Երրորդությունը, որը նաեւ անվանում են «Զվարթնոց» եկեղեցի: Եկեղեցուն կից վարժարանի դասարանները, միանձնուհիների սենյակները լուրջ վնասներ են կրել:
Ավելի վաղ տեղեկացրել էինք, որ հունիսի 2-ին Հալեպի հայկական թաղամասում տեղի ունեցած ռմբակոծության հետեւանքով զոհվել է 4 հայ՝ 1942 թվականին ծնված Վազգեն Ճապաղջուրյանը, 1949 թվականին ծնված Խաչիկ Աբուլապությանը, 1967 թվականին ծնված Հովսեփ Ջանեցյանը եւ 1954 թվականին ծնված Լևոն Քելխաչերյանը:
