Սյունիքի մարզպետ Սուրիկ Խաչատրյանի մահափորձի գործով կալանավորված Վիտալի Մինասյանի խափանման միջոցը փոխվել է:

Այս առնչությամբ դատախազության տարածած հաղորդագրության մեջ ասվում է.

«2016թ. հունիսի 1-ի որոշմամբ  Ս. Խաչատրյանին, Ա. Ղեւոնդյանին եւ Մ. Գրիգորյանին ապօրինաբար դիտավորությամբ կյանքից զրկելու փորձ կատարելու դեպքի առթիվ հարուցված քրեական գործից նախաքննական մարմինը  Հենրիկ Ավագյանի նկատմամբ անջատել է N քրեական գործը եւ փոփոխել մեղադրանքը եւ որոշումն ուղարկվել է դատախազին: 

Նկատի ունենալով, որ Հ. Ավագյանի նկատմամբ քրեական գործն անջատվել է դատավարական նորմերի պահանջների խախտմամբ, դատախազի կողմից  քննիչին տրվել է ցուցում՝  անջատված քրեական գործը մայր գործին միացնելու մասին որոշում կայացնելու եւ միեւնույն հանցագործությանը մասնակցելու մեջ մեղադրվող անձանց արարքներին մեկ վարույթի շրջանակներում պատշաճ իրավաբանական գնահատական տալու վերաբերյալ:

Տրված ցուցումների կատարման արդյունքում՝  նշված գործերը միացվել են մեկ վարույթում եւ հունիսի 10-ին  որոշումներ են կայացվել սպանության փորձի կատարմանը մասնակցելու համար Արա Բուդաղյանի եւ Վիտալի Մինասյանի նկատմամբ իրականացվող քրեական հետապնդումը դադարեցնելու մասին:

Դատախազի նույն օրը կայացված որոշումներով Արա Բուդաղյանի նկատմամբ ընտրված խափանման միջոց կալանավորումը վերացվել է, իսկ  Վիտալի Մինասյանի նկատմամբ կիրառված խափանման միջոց կալանավորումը փոփոխվել է չհեռանալու մասին ստորագրությամբ:

Որոշումների պատճեններն ուղարկվել են  քրեակատարողական հիմնարկի վարչակազմին, նախաքննության մարմնին, Ա. Բուդաղյանին եւ Վ. Մինասյանին:

Նշենք, որ այս պահի դրությամբ Արա Բուդաղյանին դեռ ազատ չեն արձակել: