նախընտրելի դարձնել
Գյումրիի ավագանու ընտրություններում «Հանրապետական կուսակցության» ցուցակը գլխավորող թեկնածուի հարցի վերաբերյալ քննարկում չեմ լսել։ NEWS.am-ի հետ զրույցում վստահեցրեց ՀՀԿ խմբակցության պատգամավոր, Գյումրիի տարածքային կառույցի ղեկավար Սուքիաս Ավետիսյանը՝ պատասխանելով հարցին, թե ճի՞շտ է տեղեկությունը, որ կանգ են առել գործող քաղաքապետի թեկնածության վրա։
«Ես նման քննարկում չեմ լսել, կհասնենք այդ օրվան, քննարկենք, ճիշտ ձեւը կգտնենք ու դրանով կառաջնորդվենք։ Դեռ ժամանակ ունենք»,-ասաց Սուքիաս Ավետիսյանը։
Ի հեճուկս Սուքիաս Ավետիսյանի պնդման՝ որոշ ՀՀԿ-ականներ վստահեցնում են, որ քննարկումները կանգ են առել Սամվել Բալասանյանի թեկնածության վրա։ Մինչ այդ մշակվող սցենարները չեղյալ են հայտարարվել, նպատակահարմար է համարվել գնալ կարճ ճանապարհով, առավել եւս որ թեժ մրցակցություն է սպասվում։
Նշենք, Գյումրիում եւ Վանաձորում նոր Ընտրական օրենսգրքի համաձայն լինելու է ոչ թե քաղաքապետի, այլ ավագանու ընտրություն, թեկնածուները պետք է առաջադրվեն որեւէ կուսակցության ցուցակով։ Քաղաքական ուժերի ակտիվությունից ենթադրվում է, որ թեժ ընտրություններ են լինելու։ Մասնակցելու են մի շարք խորհրդարանական եւ արտախորհրդարանական ուժեր։ Այդ մասին առայժմ հայտարարել են ՀՀԿ-ն, ԲՀԿ-ն, ՕԵԿ-ը, «Քաղաքացիական պայմանագիր» եւ «Լուսավոր Հայաստան» կուսակցությունները։
