«Հայկական ժամանակ» թերթը գրում է. ««Գյուղատնտեսության նախարարը կկրճատի 1982 թվականի Կատաֆալկա» վերնագրով armtimes.com-ը կիրակի օրը հոդված էր հրապարակել, որտեղ ներկայացրել էր գյուղատնտեսության նախարար Սերգո Կարապետյանի ծառայողական ավտոմեքենաների կրճատման վերաբերյալ կայքին ուղարկած հարցման պատասխանը։

Նախարարը նշել էր, որ ՀՀ կառավարություն ներկայացվել է առաջարկություն կրճատել նաեւ նախարարության կառավարման ոլորտում գործող պետական մարմիններին, ՊՈԱԿ-ներին, բաժնետիրական ընկերություններին եւ պետական հիմնարկներին պատկանող թվով 769 ծառայողական ավտոմեքենաներից 134-ը։ Նախարարության տրամադրած ցանկում ամենազարհուրելի կրճատումը նախատեսված էր «Հայջրմուղկոյուղի» ՓԲԸ-ում։ Այստեղ պատրաստվում էին կրճատել 1982 թվականի արտադրության Կատաֆալկա (հուղարկավորության մեքենա)։

«Հայջրմուղկոյուղի» ՓԲԸ-ից armtimes.com-ին երեկ տեղեկացրին, որ իրականում սխալմամբ է մեքենաների ցանկում գրվել «Կատաֆալկա», դրա փոխարեն պետք է ավտոբուսի կմախք լիներ։ Իսկ թե ինչ մակնիշի ավտոբուս է եղել դա, «Հայջրմուղկոյուղի» ՓԲԸ-ում չեն կարողացել պարզել, միայն նշեցին, որ ավտոբուսի կմախքը գտնվում է «Հայջրմուղկոյուղու» Ստեփանավանի տեղամասի տարածքում։

Մեր հարցին՝ որքա՞ն գումար է հատկացվել այս կմախքի պահպանման, ապահովագրման եւ տեխզննման համար, ընկերությունից պատասխանեցին, որ ավտոբուսի կմախքն իրենք ընդունել են որպես մետաղի ջարդոն եւ հետեւաբար պահպանման կամ ապահովագրական ծախսեր չեն արել»: 
Առավել մանրամասն՝ թերթի այսօրվա համարում