Նախընտրելի
Հայաստանի ԱԺ անկախ պատգամավոր Էդմոն Մարուքյանը պահանջում է հրապարակել ավտոմեքենաների մաքսազերծման արժեքները:
Այս առնչությամ, նրա տարածած հայտարարության մեջ, մասնավորապես, ասվում է.
«Այսօր դիմել եմ կառավարությանը՝ առաջարկելով սեղմ ժամկետներում ստեղծել ավտոմեքենաների մաքսազերծման արժեքների եւ այդ արժեքի վրա ազդող գործոնների համացանցով հասանելի տվյալների շտեմարան, որի միջոցով քաղաքացիները կկարողանան հստակ որոշել համապատասխան մեքենայի համար վճարման ենթակա մաքսազերծման գինը:
Արդեն տեւական ժամանակ է, ինչ ավտոմեքենաների մաքսազերծման գների մասին հրապարակային տեղեկատվության բացակայության ու դրա հետեւանքով առաջացած անհստակության պատճառով տեղի են ունենում չարաշահումներ մաքսային մարմինների կողմից. միեւնույն տարեթվի, մակնիշի ու սերիայի մեքենաները հաճախ մաքսազերծվում են տարբեր արժեքներով: Հեռախոսով տեղեկատվություն ստանալու բոլոր փորձերն ավարտվում են անհաջողութամբ, քանի որ մաքսային ծառայությունից մշտապես հայտնում են, որ այդ տեղեկությունները տրամադրվում են բացառապես տեղում:
Այսպիսով, ավտոմեքենաների մաքսազերծման արժեքի վերաբերյալ հրապարակային տեղեկատվության բացակայությունը բերել է այդ ոլորտում կոռուպցիոն դրսեւորումների ու չարաշահումների արմատացման:
Տվյալների բազայի ստեղծմամբ քաղաքացիների համար նաեւ կանխատեսելի կդառնա Հայաստանի Հանրապետություն ներմուծվող մեքենաների դիմաց ծախսման ենթակա իրական գումարը»:
