նախընտրելի դարձնել
Հայաստանում, այսօր` հունիսի 19-ին, «Քիմիա» եւ «Հայոց պատմություն» առարկաների միասնական քննությունների ժամանակ երկու դիմորդ է հեռացվել: Այս մասին NEWS.am-ի հետ զրույցում ասաց ԳԹԿ արտաքին համագործակցության բաժնի պետ Արա Իսպիրյանը` նշելով, որ դիմորդները հեռացվել են Արմավիրի եւ Արտաշատի քննական կենտրոններից:
«Փորձել են հեռախոսների միջոցով գրել հարցերը, բայց հեռացվել են: Այս պահի դրությամբ այսքանը կարող եմ ասել, դեռ ընդհանուր ամփոփում չենք արել»,-ասաց նա:
Նշենք, որ այսօր «Քիմիա» առարկայից 1100 դիմորդ քննություն է հանձնել, իսկ 1460 դիմորդ` «Հայոց պատմություն» առարկայից:
Հանրապետությունում գործել է 15 քննական կենտրոն, որից՝ 4-ը Երեւանում եւ 11-ը` մարզերում:
Հիշեցնենք, որ մինչեւ այժմ դիմորդները քննություն են հանձնել «Կենսաբանություն», «Աշխարհագրություն», «Ֆիզիկա», «Ընդհանուր պատմություն», «Հայոց լեզու եւ գրականություն», «Մաթեմատիկա» , «Օտար լեզու» առարկաներից:
