Հունիսի 21-ին, ժամը 15.05-ին, հիվանդանոցից ոստիկանության Իջեւանի բաժնում հաղորդում է ստացվել, որ «ձախ վերհոնքային շրջանի կտրած պատռած վերք» ախտորոշմամբ բուժօգնության է դիմել 49-ամյա Վարդան Մ.-ն:

Ոստիկանության մամուլի ծառայությունից NEWS.am-ին հայտնում են, որ մեկնած օպերատիվ խմբին նա հաղորդում է տվել, որ նույն օրը, ժամը 13-ի սահմաններում, Ենոքավան գյուղում գտնվող հանգստյան գոտու դարպասների առջեւ Վիգեն կամ Վահագ անունով անձը վիճաբանել է իր հետ, որի ընթացքում ձեռքին եղած կաթսայով հարվածել է իր դեմքին` պատճառելով նշված վնասվածքը:

Ձեռնարկված օպերատիվ-հետախուզական միջոցառումների շնորհիվ պարզվել է, որ Վարդան Մ.-ին նշված վնասվածքը պատճառել է 40-ամյա Թաթուլ Թ.-ն:

Նշանակվել է դատաբժշկական փորձաքննություն:

Ձեռնարկվում են միջոցառումներ Թաթուլ Թ.-ին հայտնաբերելու ուղղությամբ:

Կատարվում է հետաքննություն: