Կաթոլիկ եկեղեցին հայտնել է իրադարձությունները որպես հրաշք ճանաչելու ընթացակարգի փոփոխության մասին: Նոր նորմերով կառաջնորդվեն հատուկ բժշկական հանձնաժողովի անդամները, որը կորոշի, թե արդյոք այս կամ այն իրադարձությունը հրաշք է եղել, թե ոչ, հայտնում է  BBC-ն: 

Վատիկանի կանոնների համաձայն, հրաշքներն անհրաժեշտ են բեատիֆիկացիայի (մարդուն երանելի ճանաչելու) համար: Յուրաքանչյուր մարդ, որը Վատիկանի կողմից երանելի է ճանաչվում, պետք է գոնե մեկ հրաշք գործի:  Իրադարձությունները որպես հրաշք է ճանաչում այն օրգանը, որը կոչվում է սրբերի գործերով կոնգրեգացիա:   

Բեատիֆիկացիայի կանոնների փոփոխություններն ուրբաթ հրապարակվել են փաստաթղթում, որը հաստատվել է կոնգրեգացիայի ղեկավարի`  կարդինալ Անջելո Ամատոյի կողմից: Կանոնադրության տեքստի ձեւական եւ լեզվաբանական փոփոխություններից բացի, նոր փաստաթուղթը եւս մի քանի կանոն  է ներմուծում:   

Նախ` որպեսզի հանձնաժողովի օրակարգում հայտնվի այս կամ այն իրադարձության մեջ աստվածային մասնակցության հարցը, այսուհետ կպահանջվեն կոնգրեգացիայի անդամների երկու երրորդի ձայները: Նախկինում այդ նշաձողն ավելի ցածր էր: 

Երկրորդ, մի անգամ կոնգրեգացիայի կողմից մերժվելով` իրադարձությունը կարող է կրկնակի վերլուծվել միայն երեք անգամ, յուրաքանչյուր վերաքննության համար կոնգրեգացիայի ինը անդամից կազմված քվորում է անհրաժեշտ: 

Եվս մի կանոն վերաբերում է գիտակ փորձագետների փոխհատուցմանը, որոնք յուրաքանչյուր իրադարձության վերաբերյալ որոշման շրջանակում պետք է հաստատեն, որ այն չի կարող բացատրվել գիտության կողմից: Այժմ այդ փորձագետներին հնարավոր է փոխհատուցում վճարել բացառապես բանկային փոխանցումների միջոցով: