Բելգիական արդարադատությունը մոտ ժամանակներս 2015 թվականի նոյեմբերի 13-ի փարիզյան ահաբեկչական գործողությունների` Ֆրանսիային արտահանձնված մասնակից Սալահ Աբդեսլամին մեղադրանք կներկայացնի 2016 թվականի մարտի 22-ին Բրյուսելում ահաբեկչական գործողություններին մասնակցության համար, հայտնում է  L'Obs-ը:

Բելգիան պետք է շատ արագ Ֆրանսիային խնդրի իրեն տրամադրել ձերբակալվածին:  Եվ ոչ թե պատահական մեկին, որովհետեւ խոսքը Փարիզում նոյեմբերի  13-ին ահաբեկչություն իրականացրած խմբից միակ ողջ մնացած Սալահ Աբդեսլամի մասին է, հայտնում է պարբերականը` վկայակոչելով  իրավապահ մարմիններում աղբյուրին:   

Աբդեսլամը ձերբակալվել է Բրյուսելում 2016 թվականի մարտի 18-ին եւ Ֆրանսիային է հանձնվել ապրիլի 27-ին:

Ֆրանսիային արտահանձնումը տեղի է ունեցել, որովհետեւ ահաբեկչի ձերբակալության վերաբերյալ եվրոպական օրդերը տրվել ավելի շուտ, քան բելգիական քննությունը հիմքեր կձեւակերպեր  Բրյուսելում ահաբեկչական գործողությանը հանցակցության առումով նրան մեղադրանք ներկայացնելու համար:  Սակայն Աբդեսլամի նկատմամբ քննություն էր ընթանում Բելգիայում, որտեղ իշխանությունները պարզում էին բրյուսելյան ահաբեկչական գործողություններում նրա դերը: 

Բելգիայում նրան կասկածում են մարտի 22-ին պայթյուններ իրականացրած ահաբեկիչների խմբին անդամակցության մեջ: Բնակարանում, որտեղ Աբդեսլամը թաքնվում էր մինչեւ ձերբակալությունը, քննիչները պայթուցիկ սարքերի համար երկու դետոնատոր են գտել:   Ենթադրվում է, որ Աբդեսլամը մասնակցել է բրյուսելյան ահաբեկչական գործողություններին` օգնություն տրամադրելով դրա իրականացնողներին: