Եվրոպական ներդրումային բանկի աջակցությամբ՝ ավարտվում է Երեւանում 5 հասարակական շենքերի աուդիտը։ Այս մասին NEWS.am–ի հետ զրույցում ասել է ծրագրի փորձագետ Տիգրան Սեկոյանը։ 
Ծրագրի համար ընտրել են 2 մանկապարտեզ, Պատանի հանդիսատեսի թատրոնը, Ալբերտ Ազարյանի անվան մարզադպրոցը եւ քաղաքային պոլիկլինիկաներից մեկը։
Ճիշտ ջերմամեկուսացումը կարող է էներգիայի սպառումը կրճատել 50-60 տոկոսով եւ դրա հետ մեկտեղ տաք մնալ։ Հիմա ընտրած մանկապարտեզներում ջեռուցման համար անհրաժեշտից 2-3 անգամ պակաս է ծախսվում, բայց դա լավ կյանքից չէ։
«Մենք ուզում ենք ցույց տալ, թե ինչպես կարելի է տնտեսել, բայց ոչ առողջության հաշվին, այլ նոր տեխնոլոգիաների օգնությամբ»,– ասել է Սեկոյանը։
Ջերմամեկուսացման առավելություններն արդեն երեւում են. 2012-13 թվականներին մասնագետները ջերմամեկուսացում են իրականացրել Ավանի 9-հարկանի շենքերից մեկում։ Հաջորդ ձմռանը շենքի բնակիչները ջեռուցման համար 58 տոկոս քիչ են վճարել։ Նախագիծն իրականացվել էր UNDP–ի եւ Երեւանի քաղաքապետարանի միջեւ հուշագրի շրջանակներում, UNDP/GEF-ի ֆինանսավորված «Շենքերի էներգետիկ արդյունավետության բարձրացում» ծրագրով:
Սակայն խնդիրն այնքան էլ հեշտ չէ լուծել։ Տասնամյակներ առաջ կառուցված շատ շենքեր հաշվարկված չեն կայունության անհրաժեշտ բալերով։
«Էներգաարդյունավետության տեխնոլոգիաներ տեղադրել շինություններում, որոնք մի քանի տարի անց պետք է վերակառուցվեն, ինքներդ հասկանում եք՝ այդքան էլ պրակտիկ չէ։ Բայց պետք է գոնե հեռանկարում հասկանաք, թե որտեղ եւ ինչքան կարելի է տնտեսել։ Դրա համար էլ մենք աշխատում ենք»,– ասել է Սեկոյանը։
Էներգետիկ աուդիտի ավարտից հետո դրա արդյունքները կներկայացվեն Երեւանի քաղաքապետարանին։ Փաստաթղթերով հնարավոր կլինի հայտ ներկայացնել քաղաքային տնտեսության եւ բնակֆոնդի ջերմային պաշտպանության վարկերի համար։