նախընտրելի դարձնելՔննադատել կարելի է՝ ում ասես, բայց ԵԱՀԿ Մինսկի խումբը միակ ձեւաչափն է, որն անում է հնարավոր ամեն ինչ՝ ղարաբաղյան հակամարտության խաղաղ ուղիով լուծելու համար: NEWS.am-ի թղթակցի հետ զրույցում այս մասին հայտարարեց Հայաստանում Ռուսաստանի արտակարգ եւ լիազոր դեսպան Իվան Վոլինկինը՝ անդրադառնալով ՄԽ-ի համանախագահների հասցեին Բաքվի քննադատությանը:
Ի պատասխան հարցին այն մասին, որ ադրբեջանական կողմը շարունակում է ղարաբաղյան հակամարտության գոտում խախտել հրադադարի ռեժիմը եւ փաստացի բանակցային գործընթացը դադարել է, Իվան Վոլինկինը նշեց. «Ես խորապես համոզված եմ, որ այս հակամարտությունը կարող է լուծվել բացառապես խաղաղ ճանապարհով: Ռազմական ուղին կհանգեցնի նոր զոհերի: Եվ ես կարծում եմ, որ այն չափանիշները, այն մեխանիզմները, որ մշակվել են միջազգային հանրության կողմից, պարզապես պետք է իրականացնել: Գոյություն ունեն Վիեննայի եւ Սանկտ Պետերբուրգի համաձայնությունները: Այս մեխանիզմներն էլ պետք է կյանքի կոչել»:
Դիտարկմանը, որ Բաքուն փաստացի չի կատարում այդ համաձայնությունները եւ կանոնավորապես քննադատում է ԵԱՀԿ Մինսկի խմբի համանախագահ երկրների գործունեությունը, Իվան Վոլինկինը պատասխանեց. «Քննադատել կարելի է՝ ում ասես, բայց ԵԱՀԿ Մինսկի խումբը միակ ձեւաչափն է, որն անում է հնարավոր ամեն ինչ՝ ղարաբաղյան հակամարտության խաղաղ ուղիով լուծելու համար: Առանց բանակցությունների հնարավոր չէ կարգավորման հասնել»:
