նախընտրելի դարձնելՀատուկ քննչական ծառայությունում քրեական գործ է հարուցվել ՀՀ ԱՆ «Արմավիր» քրեակատարողական հիմնարկի աշխատակցի կողմից պաշտոնեական դիրքը չարաշահելու եւ այն օգտագործելով խարդախություն կատարելու դեպքերի առթիվ նույն ՔԿՀ-ի դատապարտյալ Վալերիկ Հ.-ի հաղորդման հիման վրա:
Մասնավորապես, վերջինս հայտնել է, որ 2017 թվականի փետրվարին «Արմավիր» ՔԿՀ-ի անվտանգության ապահովման բաժնի ծառայողի պատվերով պատրաստել եւ նրան է փոխանցել երեք խաչ, յուրաքանչյուրը` 50.000-60.000 դրամ արժողությամբ, սակայն դրանց համար ինքը չի վճարվել: Բացի այդ, Վալերիկ Հ.-ն նույն աշխատակցին տվել է 126.000 հազար ՀՀ դրամ, որպեսզի վերջինս գնի եւ իրեն փոխանցի «Սամսունգ» մոդելի բջջային հեռախոս:
Սակայն, ըստ դատապարտյալի հաղորդման, ՔԿՀ-ի աշխատակիցը բջջային հեռախոս չի գնել եւ նշված գումարն էլ մինչ օրս ետ չի վերադարձրել, որի հետեւանքով Վալերիկ Հ.-ն հայտնվել է հոգեկան անկայուն վիճակում եւ դիմել ինքնավնասման` ածելիով կտրել է պարանոցի մի հատվածը: Նշանակվել է դատաբժշկական փորձաքննություն:
Այսպիսով, պետական հատուկ ծառայություն իրականացնող պաշտոնատար անձի կողմից պաշտոնեական լիազորությունները չարաշահելու եւ պաշտոնեական դիրքն օգտագործելով խարդախություն կատարելու վերը նշված դեպքերի առթիվ ՀՀ հատուկ քննչական ծառայությունում քրեական գործ է հարուցվել ՀՀ քրեական օրենսգրքի 308-րդ հոդվածի 1-ին մասով եւ 178-րդ հոդվածի 2-րդ մասի 1.1 կետով:
Կատարվում է նախաքննություն:
