նախընտրելի դարձնելՀանրապետության Նախագահի հետ աշխատանքային հանդիպման ժամանակ առողջապահության նախարար Լեւոն Ալթունյանն այսօր զեկուցել է առողջապահության ոլորտում իրականացվող կառուցվածքային բարեփոխումների եւ գերակա խնդիրների լուծմանն ուղղված ծրագրերի ընթացքի մասին։
Նախարար Ալթունյանը ի թիվս իրականացված եւ ընթացքում գտնվող ծրագրերի, ներկայացրել է առողջապահության ոլորտի ֆինանսական վերահսկողության եւ թափանցիկության ապահովմանը, ինչպես նաեւ բժշկական ծառայությունների որակի բարելավմանն ուղղված էլեկտրոնային առողջապահական համակարգի ներդրման ուղղությամբ նախարարության կողմից իրականացվող աշխատանքները, ընթացիկ ամսվա վերջին կառավարության հաստատմանը ներկայացվելիք պետական ծառայողների հիվանդանոցային բժշկական ծառայությունների ապահովագրական փաթեթների տրամադրման նոր մեխանիզմը, պետպատվերի շրջանակներում բժշկական կազմակերպությունների կողմից գնվող դեղերի եւ բժշկական նշանակության ապրանքների գնումների կենտրոնացված համակարգի ներդրման ուղղությամբ իրականացված աշխատանքը, որը, նախարարի հավաստմամբ, բժշկական օգնության որակի ապահովումից բացի, կդառնա տնտեսապես արդյունավետ նոր մեխանիզմով գնման հարթակ։
Առողջապահության նախարարը Նախագահին զեկուցել է նաեւ բժշկական օգնության եւ սպասարկման որակի եւ բուժման արդյունքների բարելավման նպատակով օտարերկրյա առաջադեմ փորձի հիման վրա թարգմանվող ու տեղայնացվող կլինիկական ուղեցույցների ու պացիենտի վարման գործելակարգերի կիրառման ուղղությամբ կատարված քայլերը։
Լեւոն Ալթունյանը տեղեկացրել է, որ նախարարությունը մշակել է նաեւ երկրում հեռաբժշկության զարգացման տեսլականը եւ գործողությունների ժամանակացույցը: Նախարարի հավաստմամբ, մշակվում եւ իրականացվում են առանձին բժշկական ծառայությունների հասանելիությունն ապահովելու նպատակով թիրախային ծրագրեր, մայրական մահացության ցուցանիշի նվազեցման եւ ծննդօգնության հիվանդանոցային ծառայությունների բարելավմանն ուղղված աշխատանքներ:
Նախագահի հետ նախարարի աշխատանքային հանդիպման ժամանակ անդրադարձ է եղել նաեւ մարզային հիվանդանոցների արդիականացման ծրագրերի ընթացքին։
Հանրապետության Նախագահի կողմից տրվել են համապատասխան հանձնարարականներ:
