նախընտրելի դարձնելՀՀ բնապահպանության նախարարի իրավախորհրդատու Արեգ Ղարաբեգյանը հանդիպել է ՄԱԿ-ի մանկական հիմնադրամի/UNICEF-ի/ փորձագետ Նիկոլաս Մոլինոյին եւ հայաստանյան գրասենյակի ներկայացուցիչ Տիգրան Թովմասյանին։ Հանդիպմանը մասնակցել են նաեւ ՀՀ բնապահպանության նախարարության համապատասխան ստորաբաժանումների պատասխանատուներ։
Նախարարությունից NEWS.am-ին հայտնում են, որ Ա․Ղարաբեգյանը ողջունել է հյուրերին, կարեւորելով ՄԱԿ-ի մանկական հիմնադրամի «Կլիմայի փոփոխության ազդեցությունը երեխաների վրա» ծրագրի իրականացումը Հայաստանում։
Մանկական հիմնադրամի Նյու-Յորքի գրասենյակի ներկայացուցիչ Ն․Մոլինոն ներկայացրել է տարբեր երկրների հետ տարվող ծրագրային աշխատանքների արդյունավետության բարձրացման նպատակով իրականացվող հետազոտություններն ու վերլուծությունները։
«Կլիմայի փոփոխության ազդեցությունը երեխաների վրա» ծրագրի նպատակն է ՄԱԿ-ի մանկական հիմնադրամի բոլոր ծրագրերում ներառել բնապահպանական գործոնները եւ էկոկրթական միջոցառումները։
Փորձագետն առաջարկել է ՀՀ բնապահպանության նախարարության աջակցությամբ երեխաների առողջական, սոցիալական խնդիրների լուծման եւ էկոկրթության գործընթացների բարելավման ուղիներ մշակել։ Նա նշել է, որ երեխաների բնապահպանական խնդիրների գիտակցմամբ եւ ընկալումով է պայմանավորված յուրաքանչյուր երկրի շրջակա միջավայրի բարելավումը։
