նախընտրելի դարձնելՎերջին օրերին Վանաձորի տարբեր հատվածներում ծառահատման դեպքեր են գրանցվում. մի քանի օր առաջ Վանաձորի Հալաբյան փողոցի հարակից մայթեզրին ծառահատման մասին ահազանգեց վանաձորցիներից մեկը, ֆեյսբուքյան իր էջում տեղադրելով հատված ծառի նկարը: Այսօր արդեն, վանաձորցի օգտատերերը ֆեյսբուքյան հարթակը ողողել են ծառահառման նոր լուսանկարներով:
«Ծառերի գիշերային սպանդը Վանաձորում նոր թափ է առնում: Նախորդ գիշեր 7 ծառ է հատվել թիվ 6 դպրոցի տարածքից: Վանդալիզմի այսօրինակ դրսեւորում չի եղել նույնիսկ 90-ականներին»,- ֆեյսբուքյան իր էջում գրել է Նարինե Ավետիսյանը, տեղադրելով Վանաձորի թիվ 6 դպրոցի հարակից տարածքի հատված ծառերի լուսանկարները:
NEWS.am-ի թղթակցի հետ զրույցի ընթացքում Վանաձորի քաղաքապետարանի կոմունալ տնտեսության, բնակֆոնդի ու համատիրությունները համակարգող բաժնի պետ Կարեն Պառավյանը վստահեցրեց՝ քաղաքի որեւէ հատվածում որեւէ ծառի հատման համար քաղաքապետարանը թույլտվություն չի տվել:
«Մի քանի օր առաջ Հալաբյան փողոցի վրա էլի ծառահատում էր եղել, համապատասխան մասնագետը զանգահարել է ոստիկանություն ու տեղեկացրել, որ ապօրինի ծառահատում է տեղի ունեցել: Եվ ոստիկանությունը պետք է զբաղվի այդ հարցով, գտնի այդ արարքը կատարողին: Այլ բան, կարծում եմ՝ քաղաքապետարանը չէր կարող կատարել: Հո ամեն ծառի մոտ պահակ չենք կարող դնել»,- նշեց նա:
Դպրոցին կից ծառերի հատման մասին բաժնի պետը տեղեկացել էր քիչ առաջ:
Եթե դպրոցի տարածքում է, դա համարվում է դպրոցի սեփականություն համարվող տարածք: Եթե մարդու սեփականության տարածքում է, մենք որեւէ իրավասություն չունենք թույլտվություն տանք հատելու կամ չհատելու: Նման դեպքերում էլ մենք զերծ ենք մնում թույլլտվություն տալուց անկախ նրանից դա ինչ չափի ու ինչ տեսակի ծառ է»,- ասաց բաժնի պետը:
Կապ հաստատեցինք նաեւ Վանաձորի թիվ 6 դպրոցի տնօրեն Նազելի Ասատրյանի հետ: Վերջինս նշեց, որ դպրոցի տարածքում ծառերը հատվել են իր թույլտվությամբ:
«Դրանք բարեկարգման նպատակով մենք որոշել ենք մաքրենք, որովհետեւ ինքնաճ ծառեր էին: Մեծացել էին ծառերը, էդ կողմը փակել, արեւի շող չէր ընկնում: Բացի դա անընդհատ էդ ծառերի վրա երեխեքը բարձրանում էին, վտանգավոր էր: Որոշել ենք էդ մասը կտրենք, մաքրվի, կանաչապատման նպատակով ենք այդ տարածքը օգտագործելու: Իմ որոշմամբ է հատումը եղել»,- տեղեկացրեց տնօրենը:
Հարցին՝ քանի՞ ծառ է հատվել, տնօրենը դժվարացավ ասել. «Դրանք մեծ ծառեր չէին, իրենցից արժեք չէին ներկայացնում»,- ասաց նա:
Հարցին՝ քաղաքապետարանից թույլտվություն ստացե՞լ են, տնօրենը պատասխանեց.
«Քաղաքապետարանը չի դրանք տնկել, որ ես քաղաքապետարանից թույլտվություն հարցնեմ, ոչ էլ դպրոցն է տնկել, ինքնաճ ծառեր էին»:
