նախընտրելի դարձնելՀՀ Վարչական դատարանում, այսօր՝ դեկտեմբերի 8-ին, սկսվել է ՀՀ Ոստիկանության դեմ ՀՔԱ Վանաձորի գրասենյակի հայցի քննությունը:
ՀՔԱՎ գրասենյակից NEWS.am-ին հայտնում են, որ դատարան ներկայացված հայցով ՀՔԱ Վանաձորի գրասենյակը պահանջում է տեղեկատվություն տրամադրել ՀՀ Ոստիկանության աշխատակիցների թվի, այդ թվում՝ ըստ կառուցվածքային ստորաբաժանումների, եւ նրանց գործառույթների մասին:
ՀՀ Ոստիկանության իրավաբանական վարչության պետ Ա. Մարգարյանը ՀՔԱ Վանաձորի գրասենյակի նույնաբովանդակ հարցման՝ 2017 թ. սեպտեմբերի 23-ի պատասխանում տեղեկատվություն է տրամադրել միայն ոստիկանության տարբերանշանների մասին՝ մնացած մասը համարելով պետական գաղտնիք:
Այսօր դատարանում Ոստիկանության ներկայացուցիչը հայտնեց, որ հարցման այդ մասով տրամադրված տեղեկատվությունը եւս ամբողջական չէ, Կազմակերպությանը ՀՀ Ոստիկանության ստորաբաժանումների միայն մի մասի տարբերանշաններն են տրամադրվել:
ՀՔԱ Վանաձորի գրասենյակի իրավաբան Ս. Սողոմոնյանը հայցի հիմքերն ու առարկան ներկայացնելուց հետո միջնորդեց փոփոխել հայցի առարկան եւ բոլոր ստորաբաժանումների տարբերանշանների մասով եւս պահանջ ներկայացնել:
Դատարանը մերժեց միջնորդությունը՝ պատճառաբանելով, որ հարցմամբ տեղեկատվություն է պահանջվել առանձին ստորաբաժանումների տարբերանշանների վերաբերյալ, ոչ թե բոլոր, հետեւաբար՝ ՀՀ Ոստիկանությունում կարող էին չընկալել որպես բոլոր ստորաբաժանումների վերաբերյալ պահանջ: Այսքանով նախնական դատական նիստն ավարտվեց: Դատարանը դատաքննության օր է նշանակել 2018 թ. փետրվարի 9-ը:
