նախընտրելի դարձնելՁմեռ պապիկն էլ ունի երազանքներ, նա ցանկանում է, որ մեր երեխաները միշտ առույգ, զվարթ լինեն, միշտ ծիծաղեն: Այս մասին, այսօր՝ դեկտեմբերի 25-ին, ՀՀ նախագահի նստավայրում Ամանորի եւ Սուրբ Ծննդյան տոների առթիվ երեխաների համար կազմակերպված տոնական միջոցառման ժամանակ իր խոսքում նշել է ՀՀ նախագահ Սերժ Սարգսյանը:
ՀՀ նախագահի մամուլի գրասենյակից NEWS.am-ին հայտնում են, որ տոնական միջոցառումներին կմասնակցեն շուրջ 1000 երեխաներ մայրաքաղաքից, Հանրապետության մարզերից եւ Արցախից:
Նախագահ Սերժ Սարգսյանը եւ տիկին Ռիտա Սարգսյանը միջոցառման շրջանակներում այսօր առավոտյան հյուրընկալել են սահմանամերձ մի շարք համայնքների երեխաների: Տոների առթիվ դեկտեմբերի 25-ին Նախագահի նստավայր կայցելեն նաեւ առարկայական օլիմպիադաների («Կենգուրու», «Մեղու») մրցանակակիր, սահմանափակ կարողություններով (հաշմանդամ) եւ Հայաստանում ապաստան գտած սիրիահայ երեխաներ:
Փոքրիկ հյուրերի ներկայությամբ հանդիսավորությամբ վառվել են նստավայրի տոնածառի լույսերը, եւ մեկնարկել է տոնական միջոցառումը: Հանրապետության Նախագահն իր եւ տիկին Ռիտա Սարգսյանի անունից ջերմորեն շնորհավորել է միջոցառման մասնակիցներին ու բոլոր երեխաներին Ամանորի եւ Սուրբ Ծննդյան տոների կապակցությամբ, բարեմաղթանքներ հղել նրանց:
«Սիրելի՛ երեխաներ,
Ես եւ տիկին Ռիտան սրտանց շնորհավորում ենք ձեզ տոների կապակցությամբ եւ խնդրում ենք, որպեսզի դուք մեր շնորհավորանքները փոխանցեք ձեր քույրերին եւ եղբայրներին, ձեր հայրերին եւ մայրերին, ձեր տատիկներին եւ պապիկներին: Ցանկանում ենք, որպեսզի 2018 թվականին, այսինքն՝ Նոր տարում, ձեր բոլոր երազանքներն իրականան: Ես կարծում եմ, որ ձեր երազանքների իրականացումը մի զգալի մասով, երեւի, դուք կապում եք ուրիշների հետ՝ միգուցե, ձեր ծնողների, միգուցե, Ձմեռ պապիկի կամ մեկ այլ մարդու հետ, բայց բոլորդ պետք է շատ հստակ գիտակցեք, որ ձեր երազանքների իրականացումը կախված է նաեւ ձեզնից:
Ովքեր սովորում են՝ պետք է լավ սովորեն, որպեսզի ձեր ավագները, ձեր ծնողները տեսնեն, որ դուք էլ եք ուզում, որպեսզի ձեր երազանքները կատարվեն: Այստեղ երեխաների մի մասը, հավանաբար, իր երազանքների մեջ շատ մեծ բաներ է ուզում: Հավատացեք, եթե 2018 թվականին այդ երազանքները չիրականանան, դրանք իրականանալու են 2019 թվականին, 2020 թվականին. միշտ պետք է երազել: Եվ որպեսզի, երբ դուք դառնաք, օրինակ, Ձմեռ պապիկի տարիքի չափ, կարողանաք հիշել, ասել՝ ահա, ես այսքան երազանքներ եմ ունեցել, եւ այսքանը իրականացել է: Ձմեռ պապիկն էլ ունի երազանքներ, նա ցանկանում է, որ մեր երեխաները միշտ առույգ, զվարթ լինեն, միշտ ծիծաղեն, որպեսզի մեր բոլոր երեխաները լավ սովորեն, որ որեւէ բանի կարիք չունենան: Նույնը ցանկանում է Ձյունանուշիկը: Դրա համար էլ իրենք այս օրերի ընթացքում հանդիպում են շատ-շատ երեխաների հետ, եւ իրենք էլ գիտեն՝ այն երեխաների երազանքն է իրականանում, ովքեր ձգտում են դրան»,- ասել է Հանրապետության Նախագահը եւ խնդրել երեխաներին Ձմեռ պապի եւ Ձյունանուշի ներկայությամբ հնչեցնել իրենց ցանկություններն ու երազանքները:
Բաղրամյան 26-ում Ամանորի նախաշեմին երեխաների համար կազմակերպվող ավանդական դարձած տոնական միջոցառումների շրջանակներում վաղը՝ դեկտեմբերի 26-ին, կհյուրընկալվեն նաեւ ՀՀ ԶՈՒ զինծառայողների, Արցախյան ազատամարտում, ինչպես նաեւ ապրիլյան քառօրյա պատերազմում զոհված, հաշմանդամ դարձած զինվորների, Երկրապահ կամավորական միության, ՀՀ ոստիկանության եւ ազգային անվտանգության ծառայության աշխատակիցների ընտանիքների երեխաներ եւ թոռնիկներ»:
