Ռուսաստանի արտգործնախարար Սերգեյ Լավրովը եւ ԱՄՆ պետքարտուղար Ռեքս Թիլերսոնը համակարծիք են, որ ԿԺԴՀ-ում հրթիռամիջուկային մշակումները խախտում են ՄԱԿ Անվտանգության խորհրդի պահանջները: Այս մասին նշվել է երկու երկրների արտգործնախարարների հեռախոսազրույցի ժամանակ:

Ռուսաստանի ԱԳՆ մամուլի ծառայությունը հաղորդում է, որ Լավրովը մեկ անգամ եւս ընդգծել է Կորեայի թերակղզու շուրջ լարվածության ավելացման անթույլատրելիությունը Վաշինգթոնի կողմից Փհենյանի հանդեպ ագրեսիվ հռետորաբանության եւ տարածաշրջանում զինված նախապատրաստրությունների համատեքստում: Ընդգծվել է պատժամիջոցների լեզվից բանակցային գործընթացին շտապ անցնելու անհրաժեշտությունը:

Կողմերը քննարկել են Սիրիայում տարածքային ամբողջականության պահպանմամբ հակամարտության հաղթահարման հետագա քայլերը՝ ներառյալ Սոչիում միջսիրիական ազգայկիին երկխոսության համաժողովի անցկացումը:

Կողմերն անդրադարձել են  նաեւ այլ միջազգային թեմաներին, այդ թվում Ուկրաինայում իրավիճակին Մինսկի համաձայանությունների կատարման համատեքստում:

 Երկկողմ հարաբերությունների քննարկման ժամանակ զրուցակիցները պայմանավորվել են ռազմավարական կայունության ոլորտում արդիական խնդիրների հարցով երկխոսությունն ակտիվացնել: