նախընտրելի դարձնել«Ելք» խմբակցության պատգամավոր Մանե Թանդիլյանը գրությամբ դիմել է Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի նախագահ Վարդեւան Գրիգորյանին՝ առաջարկելով Փարաքար համայնքի ջրահեռացման համակարգի խնդիրների եւ դրանց լուծման վերաբերյալ խորհրդարանական լսումներ կազմակերպել:
Գրության մեջ, մասնավորապես, ասվում է.
«Հարգելի՛ պարոն Գրիգորյան,
Քաջատեղյակ եք, որ Փարաքար համայնքի ջրահեռացման համակարգը, որը կառուցվել էր տարիներ առաջ, ներկայումս չի գործում եւ ջրահեռացման համակարգի փաստացի բացակայությունը համայնքի համար առաջացնում է կոմունալ եւ հակասանիտարական խնդիրներ:
26.03.2018թ. ՀՀ ԷԵԲՊՆ ջրային տնտեսության պետական կոմիտեի նախագահն ի պատասխան իմ՝ 20.03.2018թ. N 095-Ե-51 գրության տեղեկացրեց, որ ձեզ հասցեագրված 06.03.2018թ. գրությամբ հայտնել է, որ ՀՀ ԷԵԲՊՆ ջրային տնտեսության պետական կոմիտեն առաջիկայում կձեռնարկի համապատասխան քայլեր՝ ՀՀ Արմավիրի մարզի Փարաքար համայնքի ջրահեռացման համակարգը՝ ներառյալ կեղտաջրերի մաքրման կայանը համայնքի հաշվեկշռին ետ հանձնելու ուղղությամբ:
Ծանոթանալով այդ գրությանը, հանգել եմ նրան, որ կոմիտեն նպատակադրված չէ համակարգը վերագործարկել եւ լուծել վերջինիս պատշաճ շահագորժման խնդիրը, այլ պարզապես ցանկանում է խնդիրը դուրս բերել իր պատասխանատվության դաշտից՝ առանց շտկելու կոմիտեի ենթակայության շրջանում համակարգի խափանման հարցը:
Սույնով առաջարկում եմ Ձեզ, հիմք ընդունելով Ազգային ժողովի կանոնակարգ սահմանադրական օրենքի հոդված 12-ի 1-ին մասի 5-րդ ենթակետը, իրականացնել խորհրդարանական լսումներ Փարաքար համայնքի ջրահեռացման համակարգի խնդիրների եւ դրանց լուծման վերաբերյալ: Առաջարկում եմ նաեւ հրավիրել ջրային պետական կոմիտեի նախագահին, «Վեոլիա ջուր» ՓԲԸ-ի պատասխանատուներին, «Ջինջ» ՍՊԸ-ին, Տարածքային կառավարման եւ զարգացման նախարարին, Փարաքար համայնքի ղեկավարին եւ ավագանու անդամներին, ինչպես նաեւ համայնքի բնակիչներին: Լսումները հնարավորություն կընձեռեն լսել համայնքի բնակիչներին, մանրամասն ծանոթանալ կոմիտեի դիրքորոշմանը եւ քննարկել խնդրի լուծման ճանապարհները:
Հայտնում եմ նաեւ պատրաստակամությունս լսումների կազմակերպմանը ներգրավվելու եւ նպաստելու համայնքի կենսական խնդրի լուծմանը»:
