նախընտրելի դարձնել
Հայաստանը լուրջ խնդիր ունի Սիրիայի հայ համայնքին պաշտպանելու: Այս մասին NEWS.am-ի թղթակցի հետ զրույցում հայտարարել է արաբագետ Սարգիս Գրիգորյանը:
Ըստ նրա, Սիրիայի հայ բնակչությունն անցյալում եւս թուրքական զենքի թիրախի տակ էր: Եւ Թուրքիայի կողմից զինված գործողությունները միշտ էլ ուղեկցվել են հայ համայնքի նկատմամբ սպառնալիքներով: Պատասխանելով այն հարցին՝ արդյոք դա նշանակում է, որ Հայաստանը պետք է ամրապնդի ռազմական համագործակցությունը Սիրիայի հետ, փորձագետը պարզաբանել է, որ ռազմական միջամտությունն անթույլատրելի է: «Աշխատանքներ պետք է տարվեն դիվանագիտական մակարդակով, համաշխարհային հանրության հետ հաղորդակցվելու միջոցով»,- պարզաբանել է նա:
Անդրադառնալով Սիրիայում կոալիցիայի գործողություններին` երկրից ԱՄՆ զորքերի դուրսբերման պայմաններում, Գրիգորյանը նշել է, որ հնարավոր է կանխատեսել, որ Միացյալ Նահանգները կշարունակի գործադրել օդային հարվածներ` ահաբեկիչների դեմ պայքարում իր դաշնակիցներին աջակցելու համար: «Ամենայն հավանականությամբ, ԱՄՆ-ը կշարունակի հարվածներ տեղալ Իրաքի կողմից: Իսկ կոալիցիայի մյուս անդամները կշարունակեն ակտիվ ռազմական գործողություններ իրականացնել` իրենց անկախությունն ԱՄՆ-ից ցուցադրելու համար: 2019 թվականն այս առումով ուժերի ցուցադրման տարի կլինի»-եզրափակել է փորձագետը:
Հիշեցնենք, որ ԱՄՆ նախագահ Դոնալդ Թրամփը դեկտեմբերի 19-ին հայտարարել էր Սիրիայից ամերիկյան զորքերի դուրս բերումն սկսելու որոշման մասին: Նա հիմնավորեց դա այն հանգամանքով, որ Սիրիայում ԻԳԻԼ ահաբեկչական խմբավորման դեմ հաղթանակը տարված է, եւ ահաբեկիչների դեմ պայքարը միակ պատճառն էր, որի համար ԱՄՆ զինված ուժերն այնտեղ էին գտնվում: ԱՄՆ պաշտոնական անձանց տվյալներով, ավելի քան 2 հազար մարդկանց թվաքանակով զորքերի դուրսբերումը կտեւի 60-ից մինչեւ 100 օր:
