18 հարց՝ 2018–ի մասին ամանորյա շարքի հարցերին պատասխանում է Կրթության և գիտության նախարարի պաշտոնակատար Արայիկ Հարությունյանը։

Որտե՞ղ եք անցկացնելու ամանորյա արձակուրդները։

Տանը՝ ընտանիքի անդամների հետ, մարզերում՝ ընկերների ու հարազատների:

Որքա՞ն գումար եք մտադիր ծախսել տոների ընթացքում։

Ամանորի ծախսերը ես չեմ կատարում զբաղվածության պատճառով: Դա չեմ արել նաև նախորդ տարիներին, այդ պատճառով դժվարանում եմ պատասխանել: Ակնհայտ է մի բան, որ նախորդ տարվա համեմատ մեր տան Ամանորի ծախսերը չեն ավելացել:

Անցնող 2018 թվականին ձեր անձնական գլխավոր ձեռքբերումը։

Դժվարանում եմ ինչ-որ բան առանձնացնել: Բայց կարող եմ ասել, որ շատ ուրախ եմ, որ անմիջական մասնակցություն եմ ունեցել մեր պատմության ամենակարևոր իրադարձություններից մեկի՝ Թավշյա հեղափոխության նախապատրաստմանն ու իրագործմանը:

2018 թվականին ձեր անձնական ամենամեծ թերացումը։

Բոլոր անհաջողությունների դեպքում էլ տխրում եմ, այնպես որ չեմ կարող դրանցից որևէ մեկն առանձնացնել: Բայց դրանք շատ չեն եղել։

Եթե հավատայիք Ձմեռ պապին, ի՞նչ նվեր կուզեիք նրանից։

Վերջին տարիների իմ միակ ցանկությունն է՝ օրը դառնա 26 ժամ:

Եթե հայ քաղաքական դաշտի կանանցից Ձյունանուշ ընտրեիք, ո՞ւմ կընտրեիք։

Հմ, բարդ հարց է: Այս պահին քաղաքական դաշտի կին ամենակարևոր դերակատարներն են Լենա Նազարյանը և Լիլիթ Մակունցը:

2018 թ. Ձեզ ամենաշատը տպավորած գիրքը։ Ինչո՞ւ։

Այս տարի քաղաքական իրադարձությունները րոպե անգամ չեն թողել կենտրոնանալու գրքերի վրա: Ներկայում մի քանիսը դրված են կողքի, որպեսզի Ամանորի հանգստի ժամանակ կարողանամ կարդալ:

2018 թ. Ձեզ ամենաշատը տպավորած ֆիլմը։ Ինչո՞ւ։

Նույնը կարող եմ ասել ֆիլմերի մասին:

2018 թ. Ձեզ ամենաշատը տպավորած երգը։ Ինչո՞ւ։

Իհարկե, «Իմ քայլը»։

Ինչո՞վ եք զարմացնելու Ձեզ եւ մեզ 2019 թվականին։

Ի պաշտոնե կարող եմ զարմացնել այս պահին այս ոլորտի արդյունքներով: Վստահ եմ, որ 2019-ին դրանք նույնպես քիչ չեն լինելու:

Ամանորի հայկական ավանդույթներից ո՞րն եք ամենաշատը սիրում եւ որը՝ ամենաքիչը։

Չեմ սիրում, երբ մարդիկ մեկը մյուսին պարտադրված հյուր են գնում: Ամանորը յուրաքանչյուրի ուրախ ժամանակ անցկացնելու համար է: Կարևոր է, որ մարդիկ վայելեն հանգիստն ու իրենց համար սիրելի անձանց ներկայությունը:

Ամանորի գիշերը ո՞րերորդ զանգով կամ հաղորդագրությամբ եք շնորհավորում կուսակցության ղեկավարին։

Ամանորի գիշերը որևէ ղեկավարի երբևէ չեմ շնորհավորել:

Եթե Ձմեռ պապը մեկ օրով Հայաստանում լիներ, առաջին հերթին ո՞ւր կտանեիք եւ ի՞նչ ցույց կտայիք մեր երկրում։

Կտանեի մարզեր, ուր հնարավորության դեպքում սիրում եմ գնալ: Այստեղ բազմաթիվ դրական հույզեր են կուտակված:

Մեկը հին իրերն է նետում, մյուսը՝ լույսերը միացնում կամ դռները բաց թողնում. ժողովրդական հավատալիքներից Դուք որի՞ն եք հետեւում։

«Հին» մարդկանց եմ «թողնում» նախորդ տարում:

Ե՞րբ է ձեր տանը վերջանում խոզի բուդը։

Ժամանակին։

Ձեր ամենասիրած խմիչքը։

Կոնյակ:

Ո՞րերորդ բաժակից կարող եք հայտնվել «Բաղնիքդ անուշի» հերոսի դերում։

Ես ալկոհոլ շատ չեմ օգտագործում: Նույնիսկ շատ օգտագործելու դեպքում այդ իրավիճակում չեմ հայտնվում:

2018թ. ձեր լսած ամենասուր անեկդոտը։

Ես այն մարդկանցից եմ, որ սիրում եմ անեկդոտներ, սակայն դրանք չեմ հիշում անհրաժեշտ պահին: Բայց ամենավերջին հումորներից դուր է եկել ստեղծվելիք նոր նախարարության հումորային անվանումը՝ Կրթության, գիտության, մշակույթի, սպորտի, սիրո և համերաշխության նախարարություն: