Կարագանդայի  մարզի հայկական սփյուռքի ներկայացուցիչները հանդիպել են ամանորյա գիշերը միջադեպի ժամանակ զոհվածի ընտանիքի հետ: Այս մասին NEWS.am-ին հայտնեց Կարագանդայի հայկական սփյուռքի նախագահ Արթուր Նավասարդյանը:

Հայկական համայնքն ավելի վաղ հայտարարությամբ էր հանդես եկել, իսկ հանդիպման ժամանակ զոհված երիտասարդի հարազատներին ցավակցություն էր հայտնել  եւ համայնքի անունից ներողություն խնդրել:

«Քննությունը շարունակվում է: Մենք վստահ ենք, որ մեղավորները կպատժվեն», - ընդգծեց Արթուր Նավասարդյանը:

Միաժամանակ նա նշեց կատարվածում ազգային, միջէթնիակական պատճառի որոնման անթույլատրելիության մասին:

«Այս վարկածի կողմնակիցներին պետք է հիշել, որ ձերբակալվել է երեք մարդ՝ երկու հայ եւ մեկ ղազախ:

Սա ուղղակիորեն մատնանշում է  հանցագործության միջէթնիկական հիմքի բացակայությանը: Այստեղ չկան ազգություններ, կան ծեծկռտուքի մասնակիցներ», - ասաց Նավասարդյանը:

Նրա խոսքով՝ ներկա պահին իրավիճակը հանգիստ է: Նշենք, որ հետախուզման մեջ գտնվող Նարեկ Գուրուրյանը դեռ չի հանձնվել:

Ղազախստանի ՆԳՆ պաշտոնական տվյալներով՝ «Հին Հռոմ» սրճարանում զանգվածային ծեծկռտուքի պատճառն այն էր, որ ամանորյա գիշերը մոտավորապես 4:00-ին հաստատության սեփականատերերը փորձել են փակել այն:

Սա առաջացրել էր այցելուների դժգոհությունը, նրանց էին միացել ընկերները, ծեծկռտուք էր սկսվել: Ծեծկռտուքի ժամանակ մահացել էր Կարագանդայի բնակիչ Ռախիմջան Ժանսեյտովը: