Հելսինկիում շուտով կարող  է չիպսերի թանգարան բացվել, որտեղ ցուցադրանմուշներ կդառնան չիպսերը: Այն կբացվի քաղաքի կենտրոնից քիչ հեռու՝ Էտու Տյոյոլյո շրջանում, հաղորդում է ՏԱՍՍ-ը:

Ներկայումս համացանցում թանգարանի բացման համար միջոցներ են հավաքում:

«Էտու Տյոյոլյոյում չիպսերի թանգարանը կերաշխավորի, որ մի օր վաճառքից անհետացած չիպսերը նրա արխիվում կհայտնվեն: Ոչ ոք ստիպված չի լինի կարոտել ապրանքը, որի կյանքի տեւողությունը կարող է զարմանալիորեն կարճ լինել:

Երբեմն միայն այն միտքը, որ այն ինչ-որ տեղ ֆիզիկապես գոյություն ունի, կարող է հոգեկան հանգստություն պարգեւել», - ասվում է www.mesenaatti.me քրաուդֆաունդինգի կայքում, որտեղ նախագծի մասին տեղեկատվություն է հրապարակված:

Թանգարանի համար գումարը կհավաքեն մինչեւ մայիս, ներկայումս հաշվին արդեն 1 հազար եվրո կա: Helsingin Uutiset թերթը հաղորդել է, որ գաղափարի հեղինակի՝ հիփ-հոփ կատարող Ֆեդի Կամարիի նպատակը ընդհանուր առմամբ 5 հազար եվրո հավաքելն է:

Գարնան ընթացքում  նա ցանկանում է թանգարանում տարբեր համերով չիպսերի 100 փաթեթ հավաքել, ինչպես ֆիննական, այնպես էլ օտարերկրյա արտադրողներից, որպեսզի այցելուներին պատմի, թե ինչ են սիրում Ֆինլանդիայում, իսկ ինչ արտասահմանում:

Կամարին իրեն չիպսերի մեծ սիրահար է անվանում եւ խոստովանում, որ փորձում է համտեսել բոլոր նոր համերը: