նախընտրելի դարձնելВВС-ին տված հարցազրույցի ժամանակ Լեւոն Տեր-Պետրոսյանի հայտարարությունը, ըստ որի 1997 թվականին հնարավոր էր լուծել Ղարաբաղի հարցը` զիջելով որոշ տարածքներ Լեռնային Ղարաբաղի միջանկյալ, այնուհետեւ վերջնական կարգավիճակի դիմաց, վկայում է Հայաստանի առաջին նախագահի պարտվողական տրամադրվածության մասին: Այդ մասին NEWS.am-ի թղթակցի հետ զրույցում ասել է Հայաստանի հանրապետական կուսակցության փոխնախագահ Ռազմիկ Զոհրաբյանը:
Նրա խոսքով, խնդրի լուծումը տարածքները զիջելու հաշվին ամենահեշտն է եւ դրան հնարավոր է հասնել ցանկացած պահի: «Հենց այդպիսի տրամաբանությամբ են առաջնորդվել Հայաստանի շատ ղեկավարներ, ինչի արդյունքում մեր երկրի տարածքը կրճատվել հասել է 29 հազար քմ-ի»,- նշեց Զոհրաբյանը: Նա նաեւ ընդգծեց, որ Լեւոն Տեր-Պետրոսյանի հրաժարականն արդարացված էր, քանի որ նրա եւ Լեռնային Ղարաբաղի իշխանություների միջեւ կային մեծ տարաձայնություններ Ղարաբաղի հարցի լուծման վերաբերյալ մոտեցումներում:
«Մինչդեռ, Հայաստանի եւ Լեռնային Ղարաբաղի ներկայիս իշխանությունների միջեւ այդ հարցում լիարժեք փոխըմբռնում է: Երեւանի համար ընդունելի կլինի Ղարաբաղյան հարցի այն լուծումը, որն ընդունելի կլինի Ստեփանակերտի համար»,- պարզաբանեց նա:
Զոհրաբյանի խոսքով, տարօրինակ է նաեւ Լեւոն Տեր-Պետրոսյանի այն հայտարարությունը, որի համաձայն, նա Հայաստանի անկախության հարցը լուծել է Ռուսաստանի նախագահ Բորիս Ելցինի մի զանգով: «Հարցի այդպիսի ձեւակերպումը կոռեկտ չէ, քանի որ հայ ժողովուրդը նվաճել է իր անկախությունը բազմամյա պայքարով»,- ասաց Զոհրաբյանը:
Նշենք, որ ВВС-ին տված հարցազրույցի ժամանակ Լեւոն Տեր-Պետրոսյանը հայտարարել է, որ 1997 թվականին հնարավոր էր լուծել Ղարաբաղի հարցը` զիջելով որոշ տարածքներ Լեռնային Ղարաբաղի միջանկյալ, այնուհետեւ վերջնական կարգավիճակի դիմաց, սակայն Ստեփանակերտի իշխանությունները եւ իր անմիջական շրջապատը դեմ են արտահայտվել դրան, քանի որ համարել են, որ բանակցությունների միջոցով հնարավոր է հասնել ավելիին:
