նախընտրելի դարձնելՄայիսի 31-ին ժամը 04:25-ի սահմաններում Եղեգնաձորի բժշկական կենտրոնից ոստիկանության Եղեգնաձորի բաժնին հայտնել են, որ մարմնական վնասվածքներով իրենց մոտ են տեղափոխվել 2 երիտասարդներ:
Ինչպես NEWS.am-ին հայտնում է ֆոտոլրագրող Գագիկ Շամշյանը, հիվանդանոց է մեկնել ոստիկանության Եղեգնաձորի բաժնի օպերատիվ քննչական խումբը`ոստիկանության Եղեգնաձորի բաժնի պետ Մանվել Դավթյանի գլխավորությամբ:
Հիվանդանոց մեկնած խումբը պարզել է, որ այդ երիտասարդներն են Վայոց Ձորի մարզի Աղավնաձոր գյուղի բնակիչներ 23-ամյա Դավիթ Գրիգորյանը եւ 22-ամյա Մախոջ Միքայելյանը:
Պարզվել է, որ մայիսի 30-ին ժամը 23:30-00:00-ի սահմաններում Աղավնաձոր գյուղի լողավազանի խաչմերուկում տեղի է ունեցել վիճաբանություն: Նշված երիտասարդների հետ վիճաբանել է 23-ամյա Անտոն Պողոսյանը, ով Երեւանում աշխատում է «Աբուլիկ» ռեստորանային համալիրում որպես խոհարար:
Վիճաբանությունը տեղի է ունեցել կենցաղային հարցերի շուրջ`ինչ-որ բջջային հեռախոսի համար: Վիճաբանության ժամանակ Անտոն Պողոսյանն իր մոտ եղած դանակով մարմնական վնասվածքներ է պատճառել Դավիթ Գրիգորյանին եւ Մախոջ Միքայելյանին, որի հետեւանքով Մախոջը վնասվածքներ է ստացել կրծքավանդակի, իսկ Դավիթը` գլխի եւ մեջքի հատվածում:
Վիճաբանությունից հետո խոհարարը դեպքի վայրից դիմել է փախուստի:
Հաջորդ օրը ոստիկանության Եղեգնաձորի բաժինը օպերատիվ տեղեկություն է ստացել, որ նա գտնվում է գյուղի գերեզմանոցում:
Ոստիկաններից երկու խումբ է ստեղծվում, որոնցից մեկը մեկնում է գերեզմանոց, մյուսը` Անտոն Պողոսյանի տուն: Խոհարարին հայտնաբերում են տանը, ով ներկայացնում է հանցագործության գործիք դանակը:
Փաստի առթիվ հարուցվել է քրեական գործ` ՀՀ Քրօրի 113 հոդվածի 1-ին մասին 2-րդ կետի հատկանիշներով:
Խոհարարին տեղափոխել են ոստիկանության Եղեգնաձորի ձերբակալվածների պահման վայր:
Լուսանկարները եւ տեսանյութը ՝ Գագիկ Շամշյանի
