նախընտրելի դարձնելՏեղեկությունը, որ ԼՂՀ քաղաքացիական ավիացիայի վարչությունը թուրքական տեխնիկա է գնել Ստեփանակերտի օդանավակայանի համար, համապատասխանում է իրականությանը: Այդ մասին NEWS.am-ի թղթակցի հետ զրույցում հայտնել է ԼՂՀ քաղաքավիացիայի վարչության պետ Դմիտրի Ադբաշյանը:
«Մենք թուրքական «Demirçi makina» ընկերությունից մետաղական ցանց գործելու հաստոց ենք գնել Ստեփանակերտի օդանավակայանի համար: Ֆինանսական առումով դա շահավետ գործարք էր, ընկերությունն էլ, որ առաքել է դա, լավն է»,- նկատել է Ադբաշյանը:
Հարցին, թե ինչո՞ւ ընտրությունը կանգ առավ հենց թուրքական ընկերության վրա, Ադբաշյանը նկատեց. «Եվրոպական նման հաստոցների համեմատ թուրքական ընկերության հաստոցը էժան է ոչ թե տոկոսներով, այլ մի քանի անգամ»:
Հարցին, թե վախենո՞ւմ է արդյոք, որ թուրքական արտադրանքի ընտրությունը բացասական արձագանք կստանա ինչպես Ղարաբաղում ու Հայաստանում, այնպես էլ շահարկումների առիթ կդառնա Թուրքիայում եւ Ադրբեջանում, Ադբաշյանը պատասխանել է. «Դա բիզնես է: Ես այնտեղ որեւէ քաղաքական ենթատեքստ չեմ տեսնում»:
Անդրադառնալով Թուրքիայի ԱԳՆ բարձրաստիճան աղբյուրի հայտարարությանը, թե դա հարված է իրենց ներքաղաքական շահերին, Ադբաշյանն ասել. է. «Եթե դա Թուրքիայի ԱԳՆ դժգոհությունն է, թող իրենք էլ պարզեն իրենց ընկերության հետ, մենք ի՞նչ կապ ունենք»:
Նշենք, որ ադրբեջանական «Զերկալո» թերթի հետ զրույցում Թուրքիայի ԱԳՆ բարձրաստիճան աղբյուրը տարակուսանք էր հայտնել, որ թուրքական ընկերությունը մանսակցում է Ստեփանակերտի օդանավակայանի սպառազինմանը:
