նախընտրելի դարձնել
«Հայ ազգային կոնգրես կուսակցությունը, մասնակցելով Հայաստանում արտահերթ խորհրդարանական ընտրություններին, հունիսի 7-ին ներկայացրեց իր ընտրական ծրագիրը:
Ծրագրի մի մասը, որը վերաբերում է արտաքին քաղաքականությանը եւ Արցախի հիմնախնդրին, ներկայացրեց կուսակցության անդամ Արման Մուսիսյանը:
Նա մատնանշեց առաջին երկու հիմնական ուղղությունները, որոնց վրա կարեւոր է կենտրոնացնել ուշադրությունը անվտանգության հարցում:
«Առաջինը ոչնչացված ռազմական համակարգն է, որն արագ տեմպերով պետք է վերականգնել: Երկրորդը հայկական դիվանագիտությունն է, որը նորացման կարիք ունի: Վերջինս ունի կենսական նշանակություն, քանի որ հնարավոր է դառնում կապ հաստատել դաշնակիցների, ինչպես նաեւ բոլոր այն երկրների հետ, որոնք այսօր ազդեցություն ունեն Հայաստանի շուրջ ստեղծված իրավիճակի հետ կապված:
Առաջին հերթին անհրաժեշտ է Ռուսաստանի հետ երկկողմ նոր մեխանիզմներ ստեղծել՝ ուղղված դաշնակցային հարաբերությունների խորացմանն ու ներդաշնակեցմանը, ինչը երկարաժամկետ հեռանկարում հնարավորություն կտա վերացնել առկա սպառնալիքները եւ երկարաժամկետ անվտանգության հիմքեր ստեղծել: Հաշվի առնելով Լեռնային Ղարաբաղի անորոշ կարգավիճակը, անհրաժեշտ է, որպեսզի Ռուսաստանը, ԵԱՀԿ Մինսկի խմբի մյուս համանախագահները, ինչպես նաեւ Ադրբեջանը, այդ խնդրի պարզաբանմանն ուղղված բանակցություններ սկսեն վարել եւ աստիճանաբար փոխվստահության հասնել Հայաստանի եւ Ադրբեջանի միջեւ, ինչը թույլ կտա հետագայում ռազմական հակամարտությունը դադարեցնելու մասին համաձայնագիր կնքել եւ հող նախապատրաստել հետագա հարաբերությունների համար:
Եթե ներսում մենք հրատապ միջոցներ չձեռնարկենք, ապա մեր ձեռքերը կապված կլինեն մեր ծրագրի իրականացման հարցում: Դրա համար նախ անհրաժեշտ է հասնել պետական համակարգի վերահսկելիությանը, որը փլուզվել է ներկայիս իշխանությունների գործունեության արդյունքում:
Երկրորդ` կարեւոր է հասնել ներքաղաքական կայունության եւ հասարակության մեջ համերաշխություն ստեղծել, ինչը կդառնա հաջորդ իշխանությունների հուսալի թիկունքն արտաքին քաղաքականությունում»,- հավելեց Արման Մուսիսյանը: Կուսակցության փոխնախագահ Լեւոն Զուրաբյանը պարզաբանեց, որ ՀԱԿ նախընտրական ծրագիրը հիմնված է քաղաքական իրատեսության վրա:
«Մենք գիտենք, որ հաղթանակներ են գրանցվում, երբ պետական քաղաքականությունը հիմնված է իրատեսական հաշվարկների եւ աշխարհաքաղաքական իրողությունների վրա՝ երկրի ռեսուրսներից եւ միջազգային նորմերից ելնելով: Մեր պետությունը պարտվում է, երբ հեռանում է այդ ուղուց եւ ընտրում է արկածախնդրության ուղին, երբ սկսում է աշխարհից ավելին պահանջել, քան աշխարհը կարող է տալ: Անցյալ տարվա պատերազմն այս արկածախնդրության արդյունքն է, այն փաստը, որ 1998 թվականից ի վեր մեր երկիրը գնացել է սխալ ճանապարհով: Մենք ենք պետության փրկության ծրագիր ենք առաջարկում»,- շեշտեց նա:
Նշենք, որ Հայ ազգային կոնգրես կուսակցությունից որպես Հայաստանի վարչապետի թեկնածու առաջադրվել է երկրի առաջին նախագահ Լեւոն Տեր-Պետրոսյանը:
